Тропарь – что это такое?

Церковные службы проходят по одному сценарию и состоят из отдельных частей. Важными составляющими богослужения являются тропари и кондаки. Они могут быть посвящены Иисусу Христу, Богородице и святым угодникам. Важно понимать, что такое тропарь и кондак, поскольку эти жанры церковного песнопения имеют совершенно разное значение. Изначально тропари писались прозой, и их главным предназначением было почтение памяти мучеников и сподвижников. Только через какое-то время их стали писать рифмованными, еще спустя некоторое время начали прилагать мелодию.

Что такое тропарь и когда его читают?

Тропарь с греческого языка переводится как мелодия или трофей. Под этим понятием понимают краткое песнопение, которое раскрывает главную сущность праздника, а еще в нем может прославляться какой-то святой. Именно с тропаря начало развиваться гимнография христианской веры. Если песня предназначена для праздника, то в ней будет раскрыта сущность торжества, а если тропари посвящены конкретному святому, то в тексте будет рассказываться о его особенностях, подвигах, а также прославляться его жизнь и святость.

Разбираясь в том, что это такое тропарь, стоит упомянуть некоторую классификацию на определенные виды. Все дело в том, что с развитием литургии появилось несколько разновидностей этого вида песнопения. К примеру, есть деление по тематике: постные и праздничные тропари. Есть также «отступительное песнопение», которое в своих строчках указывает на конкретного святого, праздник или икону. Подобным термином принято называть своего рода музыкальные иллюстрации проповеди или службы в целом. Еще одно разделение тропарей учитывает их функциональность. Например, есть тропарь-стихира, который повторяет текст псалма. Еще один вариант – кафизма, такое песнопение является вставкой между основными песнями. По своим функциям еще выделяют кондак – тропарь третьей и шестой песни канона. Есть еще один вид называемый ирмосом, который поют в самом конце песнопения все люди, находящиеся в храме.

Кондак – также краткое песнопение, в котором изложено определенное событие. Появилось оно гораздо позже, а отличительной чертой можно назвать получение расширенной информации. Считается, что кондак дополняет и как бы развивает главную тему тропаря. В переводе с греческого языка слово «кондак» означает палочку, на которую наматывается пергамент. Основоположником этого жанра песнопения является Рома Сладкопевец. Еще кондаками называют строфы акафиста.

Тропари и кондаки на каждый день еще называют словесными иконами, поэтому у них существует непрерывная связь со святынями. В православном богослужении каждый день недели имеет свой тропарь, который посвящен определенной памяти:

1. Понедельник. В этот день недели принято чтить память бесплотных небесных чинов. В понедельник православные обращаются к архистратигам, которые являются главными среди ангелов.
2. Вторник. В этот день поют хвалебные песни в честь Иоанна Предтечи и других пророков.
3. Среда и пятница. Эти дни предназначены для того, чтобы верующие вспомнили о гибели Бога. Еще песни посвящены Животворящему Кресту, на котором был распят Иисус.
4. Четверг. В этот день чтят святых апостолов и Николая Чудотворца, который объединяет в себе всех святителей.
5. Суббота. В этот день принято почитать всех мучеников, и читаются заупокойные тропари.

Существуют гимны, которые стали очень популярными, что впоследствии их перевели на другой язык. К ним можно отнести тропарь под названием «Свете тихий», который создавали для вечерни. Этот красивый тропарь был отмечен латинской литургикой. Еще один известный тропарь посвящен Христову воскресению.

• Небесным Силам Бесплотным
• Архангелу единому
• Ангелу-Хранителю

Небесным Силам Бесплотным

Тропарь, глас 4

Аудио:

Небе́сных во́инств Архистрати́зи,/ мо́лим вас при́сно мы недосто́йнии,/ да ва́шими моли́твами оградите́ нас/ кро́вом крил невеще́ственныя ва́шея сла́вы,/ сохраня́юще ны пpипа́дающия приле́жно и вопию́щия:/ от бед изба́вите ны,// я́ко чинонача́льницы Вы́шних Сил.

Перевод: Небесных воинств Архистратиги, непрестанно молим вас мы, недостойные, чтобы вы оградили нас вашими молитвами под кровом крыл невещественной вашей славы сохраняя нас, припадающих усердно и взывающих: «От бед избавьте нас, как начальники Вышних Сил!»

Кондак, глас 2

Аудио:

Архистрати́зи Бо́жии,/ служи́телие Боже́ственныя сла́вы,/ А́нгелов нача́льницы, и челове́ков наста́вницы,/ поле́зное нам проси́те, и ве́лию ми́лость,// я́ко Безпло́тных Архистрати́зи.

Перевод: Архистратиги Божии, служители Божественной Славы, Ангелов начальники и людей наставники, полезное нам испросите и великую милость, как бесплотных Архистратиги.

* * *

Архангелу единому

Небе́сных во́инств Архистрати́же,/ мо́лим тя при́сно мы недосто́йнии,/ да твои́ми моли́твами огради́ши нас/ кро́вом крил невеще́ственныя твоея́ сла́вы,/ сохраня́я ны, припа́дающия приле́жно и вопию́щия:/ от бед изба́ви ны,// я́ко чинонача́льник Вы́шних Сил.

Перевод: Небесных воинств Архистратиг, непрестанно молим тебя мы, недостойные, чтобы ты оградил нас твоими молитвами под кровом крыл невещественной твоей славы сохраняя нас, припадающих усердно и взывающих: «От бед избавь нас, как начальник Вышних Сил!»

Архистрати́же Бо́жий,/ служи́телю Боже́ственныя сла́вы,/ А́нгелов нача́льниче, и челове́ков наста́вниче,/ поле́зное нам проси́, и ве́лию ми́лость,// я́ко безпло́тных Архистрати́г.

Перевод: Архистратиг Божий, служитель Божественной славы Ангелов начальник и людей наставник, полезное нам испроси и великую милость, как бесплотных Архистратиг.

* * *

Ангелу-Хранителю

Тропарь, глас 6

А́нгеле Бо́жий,/ храни́телю мой святы́й,/ живо́т мой соблюди́ во стра́се Христа́ Бо́га,/ ум мой утверди́ во и́стиннем пути́,/ и к любви́ го́рней уязви́ ду́шу мою́,/ да тобо́ю направля́ем,// получу́ от Христа́ Бо́га ве́лию ми́лость.

Перевод: Ангел Божий, хранитель мой святой, жизнь мою соблюди в благоговении пред Христом Богом, ум мой утверди на истинном пути, и любовью к небесному воспламени душу мою, чтобы тобою направляемый, получил я от Христа Бога великую милость.

Кондак, глас 4

Яви́ся мне́ милосе́рд,/ святы́й А́нгеле Госпо́день, храни́телю мой,/ и не отлуча́йся мене́ скве́рнаго,/ но просвети́ мя све́том неприкоснове́нным// и сотвори́ мя досто́йна Ца́рствия Небе́снаго.

Перевод: Явись мне милосердным, святой Ангел Господень, хранитель мой, и не отлучайся от меня скверного; но просвети меня светом неприступным и соделай достойным Царства Небесного.

Собору святого Архистратига Михаила и прочих безплотных сил.

21 ноября.

Стихи́ры, гла́с 6.

Арха́нгельския си́лы, Христе́, / престо́лу предстоя́ще Твоему́, / мо́лятся о ро́де челове́честем. / Те́х у́бо мольба́ми / язы́ков де́рзость низложи́, / ми́р все́м ве́рным подая́.

Сти́х: Творя́й Ангелы Своя́ ду́хи / и слуги́ Своя́ пла́мень о́гненный.

Окру́г престо́ла все́х Царя́ / при́сно лику́юще, / а́нгелов чи́ни, / на́с сохраня́йте, / ве́рою ва́с призыва́ющия, / и муче́ния все́х изба́вите.

Сти́х: Хвали́те Его́ вси́ Ангели Его́, / хвали́те Его́ вся́ си́лы Его́.

Оте́ц, Иже над все́ми Бо́г, / си́лы небе́сных умо́в, / безобра́зны и невеще́ственны, / певцы́ трисо́лнечныя сла́вы Своея́, / и еди́нственное Сло́во, / и Ду́х приведе́.

Сла́ва, и ны́не, богоро́дичен.

Тропа́рь, гла́с 4:

Небе́сных во́инств Архистрати́зи, мо́лим ва́с при́сно мы́, недосто́йнии, да ва́шими моли́твами оградите́ на́с кро́вом кри́л невеще́ственныя ва́шея сла́вы, сохраня́юще ны́, припа́дающия приле́жно и вопию́щия: от бе́д изба́вите ны́, я́ко чинонача́льницы вы́шних си́л.

Велича́ние:

Велича́ем тя́, святы́й Архистрати́же Бо́жий Михаи́ле, и ва́с, святи́и арха́нгели, Ангели, нача́ла, вла́сти, престо́ли, госпо́дствия, си́лы, херуви́ми, стра́шнии серафи́ми, прославля́ющия Го́спода.

Стихи́ра, гла́с 6:

Ангели Твои́, Христе́, престо́лу вели́чества во стра́се предстоя́ще и Твои́м светоли́тием при́сно осиява́еми, в вы́шних песнопе́вцы Твои́ и сове́та Твоего́ служи́телие, от Тебе́ низпосыла́еми, да́ют просвеще́ния душа́м на́шим.

Пе́рвый кано́н. Гла́с 8.

Пе́снь 1.

Ирмос: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, Еди́ному Влады́це.

Вси́ воспои́м, ве́рнии, вся́ управля́ющую невеще́ственныя го́рних лико́в чинонача́лия, Тро́ицу несозда́нную: Свя́т, Свя́т, Свя́т еси́, вопию́ще, Бо́же Вседержи́телю.

Положи́л еси́ тва́рей нача́ло, существо́ безпло́тное, Тво́рче Ангелов, пречи́стый Тво́й престо́л окружа́ющее, зва́ти Тебе́: Свя́т, Свя́т, Свя́т еси́, Бо́же Вседержи́телю.

Ра́дуйся, Гаврии́ле, тайнови́дче Бо́жия воплоще́ния, Михаи́ле же, чино́в невеще́ственных первостоя́телю, непреста́нно зову́ще: Свя́т, Свя́т, Свя́т еси́, Бо́же Вседержи́телю.

Богородичен: Трепе́щу та́инства, Христе́, Твоего́ снизхожде́ния, я́ко, Иже естество́м Бо́г, прия́л еси́ от Де́вы роди́тися я́ко Челове́к, да спасе́ши ми́р от рабо́ты проти́внаго.

Пе́снь 3.

Ирмос: Стра́х Тво́й, Го́споди, всади́ в сердца́ ра́б Твои́х, и бу́ди на́м утвержде́ние, Тя́ во и́стине призыва́ющим.

Кре́постию поста́вил еси́, Безсме́ртне, си́льныя, соверша́ющия всесвяту́ю Твою́ во́лю, Тебе́ в вы́шних всегда́ предстоя́щия.

Таи́нники Твоего́ вочелове́чения и честна́го воста́ния, Ангельския чинонача́льники, Христе́, за ны́ приими́ моля́щияся.

Ангелы приста́вил еси́ храни́тели челове́ком, я́ко Благоутро́бен, служи́тели же показа́л еси́, Христе́, спасе́ния Твои́х уго́дников.

Богородичен: Неизрече́нно зачала́ еси́ Го́спода и Спа́са, Богоневе́сто, избавля́ющаго ны́ от лю́тых, Тя́ вои́стинне призыва́ющия.

Седа́лен, гла́с 8.

Небе́сных нача́льницы и первостоя́телие высокопресто́льных и стра́шных, Боже́ственныя сла́вы, Михаи́ле и Гаврии́ле архистрати́зи, Ангелов чинонача́льницы, со все́ми безпло́тными, о служи́телие Влады́чни! О ми́ре непреста́нно моля́щеся, испроси́те оставле́ние прегреше́нных на́ми, и ми́лость, и благода́ть обрести́ в де́нь су́дный.

Сла́ва, и ны́не, Богородичен:

Богоблагода́тная, Чи́стая, Благослове́нная, благоутро́бия ра́ди щедро́т из Тебе́ Ро́ждшагося, с вы́шними си́лами, и арха́нгелы, и все́ми безпло́тными моли́ непреста́нно пода́ти на́м пре́жде конца́ ми́лостивно проще́ние грехо́в и жития́ исправле́ние, я́ко да обря́щем ми́лость.

Пе́снь 4.

Ирмос: Все́л еси́ на ко́ни, апо́столы Твоя́, Го́споди, и прия́л еси́ рука́ма Твои́ма узды́ и́х, и спасе́ние бы́сть ежде́ние Твое́ ве́рно пою́щим: сла́ва си́ле Твое́й, Го́споди.

Все́л еси́ на Ангелы, я́коже на ко́ни, Человеколю́бче, и прия́л еси́ руко́ю Твое́ю брозды́ и́х, и спасе́ние бы́сть ежде́ние Твое́ непреста́нно вопию́щим: сла́ва си́ле Твое́й, Го́споди.

Покрыва́ет Ангелы доброде́тель Твоя́, Человеколю́бче, и земли́ исполня́ет концы́ Твоего́ сла́внаго, Безнача́льне, Боже́ственнаго хвале́ния, с ни́ми Тебе́ вопию́щи: сла́ва си́ле Твое́й, Го́споди.

Изше́л еси́, Ще́дре, на спасе́ние люде́й Твои́х, Христе́, созыва́еши же дру́ги — си́лы Твоя́, и весе́лие бы́сть прише́ствие Твое́ ве́рно Тебе́ вопию́щим: сла́ва си́ле Твое́й, Го́споди.

Богородичен: Де́ва и Ма́ти преесте́ственно яви́лася еси́, Всечи́стая, я́ко Бо́га, Того́жде и Челове́ка Христа́, ро́ждшая. Ему́же со стра́хом вопию́т Ангельския чи́ни: сла́ва си́ле Твое́й, Го́споди.

Пе́снь 5.

Ирмос: От но́щи неве́дения по душелови́тельному пути́ при́сно блудя́щаго, све́том ра́зума Твоего́, Го́споди, преднаставля́я мя́, на стезю́ за́поведей Твои́х напра́ви.

Невозвра́тным жела́нием при́сно к высоте́, к Тебе́, Христе́, носи́ми, кра́йнейшему все́х жела́ний, Ангельския си́лы непреста́нно Тя́ сла́вят.

Ты́ у́мныя по существу́, нетле́нныя благода́тию Твое́ю, Христе́, устро́ил еси́ песнопе́вцы Твоего́ вели́чества, Ангелы Твоя́ по о́бразу соде́лав, Непостижи́ме.

Ты́ непрекло́нны на го́ршее к Тебе́ приближе́нием, Христе́, сохрани́л еси́ Твоя́ слуги́, исто́чник бо бла́гости Ты́ еси́, благотвори́ши досто́йно Тебе́ служа́щия.

Богородичен: Умерщвле́нную мою́ ду́шу страстьми́ ме́рзкими, Всенепоро́чная, оживи́, жи́зни Храни́теля ро́ждшая, и к стези́ ве́чней, и блаже́нней жи́зни упра́ви.

Пе́снь 6.

Ирмос: Ио́ну в ки́те, Го́споди, еди́наго всели́л еси́, мене́ же, свя́заннаго мре́жами вра́жиими, я́ко от тли́ о́наго, спаси́.

Благоле́пне от не су́щих, Го́споди, сло́вом Твои́м приве́л еси́ существа́ небе́сных безсме́ртных во́инств, светови́дны ты́я соде́ловая.

Таи́нницы честни́и Бо́жия хвале́ния бы́сте, безпло́тнии, гра́ждане небе́сныя и Боже́ственныя и́стинно ски́нии, Творцу́ досто́йно служа́ще.

Безпло́тных чи́ни у́мнии Тя́, Сы́не Бо́жий пребезнача́льный, хва́лят непреста́нно и славосло́вят, я́ко Творца́ и Созда́теля вся́ческих.

Богородичен: Со Отце́м в вы́шних, Пречи́стая, безнача́льне седя́щаго, на объя́тиих Твои́х восклони́ти сподо́билася еси́: Его́же на́м пода́ждь, Чи́стая, рабо́м Твои́м, Ми́лостива.

Конда́к, гла́с 2:

Архистрати́зи Бо́жии, служи́телие Боже́ственныя сла́вы, Ангелов нача́льницы и челове́ков наста́вницы, поле́зное на́м проси́те, и ве́лию ми́лость, я́ко безпло́тных архистрати́зи.

Икос:

Ре́кл еси́, Человеколю́бче, в Писа́ниих Твои́х: мно́жеству ра́доватися Ангелов на небеси́ о челове́це еди́ном ка́ющемся, Безсме́ртне. Те́мже мы́, и́же в беззако́ниих, Безгре́шне еди́не Сердцеве́дче, Тя́ моли́ти всегда́ дерза́ем, я́ко Благоутро́бнаго, уще́дрити и низпосла́ти недосто́йным умиле́ние, Влады́ко, подая́й на́м проще́ние, о все́х бо на́с мо́лятся Тебе́ безпло́тных архистрати́зи.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Све́ты яви́л еси́, Ще́дре, Ангелов Твои́х невеще́ственное существо́, неизрече́ннаго све́та исполня́еми непреста́нно, — благослове́н еси́, — зову́щия, — Бо́же, во ве́ки.

Ему́же предстоя́т непреста́нно, служа́ще, тмы́ Ангелов, Лица́ же зре́ти не терпя́т зре́ния, — благослове́н еси́, — зову́ще, — Го́споди Бо́же, во ве́ки.

Сло́вом Твои́м Ипоста́сным Ангельское естество́ соде́лал еси́, освяти́в же Боже́ственным Ду́хом, Тро́ицу богосло́вити научи́л еси́, Бо́же, во ве́ки.

Тро́ичен: Три́ у́бо, у́мствующе, Ипоста́си, неопи́санное сла́вим Существо́, Отца́, Сло́ва со Ду́хом, вопию́ще: благослове́н еси́, Го́споди Бо́же, во ве́ки.

Пе́снь 8.

Ирмос: На горе́ святе́й просла́вльшася, и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Ангельскому поревну́им житию́, и мы́сли впери́м к высоте́, и с ни́ми невеще́ственно воспои́м Го́спода, пою́ще и превознося́ще во вся́ ве́ки.

Лико́вственницы ликова́ния небе́снии, престо́л обстоя́ще сла́вы, о́крест Бо́га же всегда́ обраща́ющеся, Ангели пою́т и превозно́сят Его́ во вся́ ве́ки.

Невеще́ственнаго огня́ творя́щей пла́мень, на высоте́ непреста́нно служа́щия, и Ангелы ду́хи явля́ющей, Тро́ице покланя́емся и славосло́вим во вся́ ве́ки.

Богородичен: Ему́же на небеси́ предстоя́т с тре́петом тмы́ Ангел и арха́нгел, Того́ на объя́тиих носи́ти сподо́билася еси́, Богоро́дице, моли́ спасти́ся славосло́вящим Его́ во вся́ ве́ки.

Пе́снь 9.

Ирмос: Уста́вы прешла́ еси́ естества́, Соде́теля заче́нши и Го́спода, и две́рь спасе́ния ми́рови была́ еси́, те́м Тя́, Богоро́дице, непреста́нно велича́ем.

Тя́, неизрече́нно соедини́вшаго небе́сным, Христе́, земна́я и еди́ну Це́рковь соверши́вша Ангелов и челове́ков, непреста́нно велича́ем.

Ангели же и арха́нгели, престо́ли, вла́сти и госпо́дства, нача́ла же и си́лы, херуви́ми и серафи́ми, с Богоро́дицею о ми́ре моли́теся.

Все́х предста́телие показу́ющиися, Михаи́л с Гаврии́лом, посети́те от любве́ чту́щия всепра́зднственную па́мять ва́шу и ве́рно воспева́ющия: спаса́йте от вся́каго обстоя́ния.

Богородичен: Ра́дуйся, свята́я Богоневе́сто! Ра́дуйся, Све́т ми́ру ро́ждшая ве́рным! Ра́дуйся, стено́ и покро́ве все́х на́с: Бо́га, я́ко Благоде́теля, за ны́ непреста́нно моли́.

Свети́лен.

Огненных, Архистрати́же, слу́г предста́тельство от Отца́ прия́л еси́, Михаи́ле, све́тов, те́м и сия́ние Того́ сла́вы сия́ющее и́маши, окру́г пречи́стаго престо́ла ты́ предстоя́, я́ко пе́рвый невеще́ственных чино́в.

Сла́ва.

Невеще́ственных си́л, арха́нгел и Ангел, госпо́дьств, и престо́л, и нача́л предста́тель пред Бо́гом постоя́нный, Архистрати́же боже́ственне, Михаи́ле пресла́вне, нестерпи́мому бо престо́лу предстоя́й, покры́й, соблюди́, сохрани́ и спаси́ вся́, ве́рою тя́ почита́ющия, мирска́го предста́теля.

И ны́не, Богородичен:

Честне́йшая еси́ херуви́м сла́вных и серафи́м, Всепе́тая, стра́шных без сравне́ния сла́внейшая и все́х святы́х Ангел святе́йшая, Пречи́стая: Зижди́теля бо все́х пло́тски неизрече́нно родила́ еси́, Богоро́дице. Его́же моли́ рабо́м Твои́м разреше́ние дарова́ти прегреше́ний.

Молитва святому Архангелу Михаилу

О, святы́й Михаи́ле Арха́нгеле, светлообра́зный и гро́зный Небе́снаго Царя́ воево́до! Пре́жде Стра́шнаго Суда́ осла́би ми пока́ятися от грехо́в мои́х, от се́ти ловя́щих изба́ви ду́шу мою́ и приведи́ ю́ к сотво́ршему ю́ Бо́гу, седя́щему на Херуви́мех, и моли́ся о ней приле́жно, да твои́м хода́тайством по́слет ю́ в ме́сто поко́йное. О гро́зный Воево́до Небе́сных Сил, предста́телю всех у Престо́ла Влады́ки Христа́, храни́телю тве́рдый всем челове́ком и му́дрый ору́жниче, кре́пкий Воево́до Небе́снаго Царя́! Поми́луй мя, гре́шнаго, тре́бующаго твоего́ заступле́ния, сохрани́ мя от всех ви́димых и неви́димых враг, па́че же подкрепи́ от у́жаса сме́ртнаго и от смуще́ния диа́вольскаго и сподо́би мя непосты́дно предста́ти Созда́телю на́шему в час стра́шнаго и пра́веднаго Суда́ Его́. О всесвяты́й вели́кий Михаи́ле Архистрати́же! Не пре́зри мене́, гре́шнаго, моля́щагося тебе́ о по́мощи и заступле́нии твое́м, в ве́це сем и в бу́дущем, но сподо́би мя та́мо ку́пно с тобо́ю сла́витии Отца́ и Сы́на и Свята́го Ду́ха во ве́ки веко́в. Ами́нь.

Молитва вторая Архангелу Михаилу

Святы́й и вели́кий Арха́нгеле Бо́жий Михаи́ле, неисповеди́мыя и пресу́щественныя Тро́ицы пе́рвый во А́нгелех предстоя́телю, ро́да же челове́ческаго приста́вниче и храни́телю, сокруши́вый с во́инствы свои́ми главу́ прего́рдаго Денни́цы на небеси́ и посрамля́яй вы́ну зло́бу и кова́рства его́ на земли́! К тебе́ прибега́ем с ве́рою и тебе́ мо́лимся с любо́вию: бу́ди щит несокруши́м и забра́ло тве́рдо Святе́й Це́ркви и Правосла́вному Оте́чествию на́шему, огражда́я их молниено́сным мече́м твои́м от всех враг, ви́димых и неви́димых. Не оста́ви же, о Арха́нгеле Бо́жий, по́мощию и заступле́нием твои́м и нас, прославля́ющих днесь свято́е и́мя твое́: се бо, а́ще и многогре́шни есмы́, оба́че не хо́щем в беззако́ниих на́ших поги́бнути, но е́же обрати́тися ко Го́споду и оживле́нным бы́ти от Него́ на дела́ блага́я. Озари́ у́бо ум наш све́том лица́ Бо́жия, и́же вы́ну сия́ет на молниеви́днем челе́ твое́м, да возмо́жем разуме́ти, что есть во́ля Бо́жия о нас, блага́я и соверше́нная, и ве́дети вся, я́же подоба́ет нам твори́ти и я́же презира́ти и оставля́ти. Укрепи́ благода́тию Госпо́днею сла́бую во́лю и немощно́е произволе́ние на́ше, да, утверди́вшеся в зако́не Госпо́днем, преста́нем про́чее вла́ятися земны́ми по́мыслы и похоте́нии пло́ти, увлека́ющеся по подо́бию несмы́сленных дете́й скороги́бнущими красо́тами ми́ра сего́, я́ко ра́ди тле́ннаго и земна́го безу́мне забыва́ти ве́чная и небе́сная. Над все́ми же си́ми испроси́ нам свы́ше дух и́стиннаго покая́ния, нелицеме́рную печа́ль по Бо́зе и сокруше́ние о гресе́х на́ших, да остаю́щее нам число́ дний вре́меннаго живота́ на́шего иждиве́м не во угожде́нии чу́вств и рабо́те страсте́м на́шим, но во изглажде́нии зол, соде́янных на́ми, слеза́ми ве́ры и сокруше́ния серде́чнаго, по́двигами чистоты́ и святы́ми дела́ми милосе́рдия. Егда́ же прибли́зится час оконча́ния на́шего, освобожде́ния от уз бре́ннаго сего́ телесе́, не оста́ви нас. Арха́нгеле Бо́жий, беззащи́тных проти́ву духо́в зло́бы поднебе́сных, обы́кших прегражда́ти душе́ челове́честей восхо́д в го́рняя, да, охраняя́еми тобо́ю, безпреткнове́нне дости́гнем о́ных пресла́вных селе́ний ра́йских, иде́же не́сть печа́ль, ни воздыха́ние, но жизнь безконе́чная, и, сподо́бльшеся узре́ти пресве́тлое лице́ Всеблага́го Го́спода и Влады́ки на́шего, па́дше со слеза́ми у ног Его́, в ра́дости и умиле́нии воскли́кнем: сла́ва Тебе́, дража́йший Искупи́телю наш, И́же за премно́гую любо́вь Твою́ к нам, недосто́йным, благоволи́л еси́ посла́ти А́нгелы Твоя́ в служе́ние спасе́нию на́шему! Ами́нь.

Тропари и кондаки дневные, чтомые во всю седмицу по дням

В ПОНЕДЕЛЬНИК

НЕБЕСНЫХ ЧИНОВ БЕЗПЛОТНЫХ

Тропарь, глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́твами оградите́ нас / кро́вом крил невеще́ственныя ва́шея сла́вы, / сохраня́юще нас, припа́дающих приле́жно и вопию́щих: / от бед изба́вите нас, / я́ко чинонача́льницы вы́шних Сил.

Кондак, глас 2:

Архистрати́зи Бо́жии, / служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

ВО ВТОРНИК

КРЕСТИТЕЛЯ И ПРЕДТЕЧИ ИОАННА

Тропарь, глас 2:

Па́мять пра́веднаго с похвала́ми, / тебе́ же довле́ет свиде́тельство Госпо́дне, Предте́че: / показа́л бо ся еси́ вои́стинну и проро́ков честне́йший, / я́ко и в струя́х крести́ти сподо́бился еси́ Пропове́даннаго. / Те́мже за и́стину пострада́в ра́дуяся, / благовести́л еси́ и су́щим во а́де Бо́га, я́вльшагося пло́тию, / взе́млющаго грех ми́ра / и подаю́щаго нам ве́лию ми́лость.

Проро́че Бо́жий и Предте́че благода́ти, / главу́ твою́, я́ко ши́пок свяще́ннейший от земли́ обре́тше, / исцеле́ния всегда́ прие́млем, / и́бо па́ки, я́коже пре́жде, / в ми́ре пропове́дуеши покая́ние.

В СРЕДУ

КРЕСТА

Тропарь, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды на сопроти́вныя да́руя / и Твое́ сохраня́я Кресто́м Твои́м жи́тельство.

Кондак, глас 4:

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ нас си́лою Твое́ю, / побе́ды дая́ нам на сопоста́ты, / посо́бие иму́щим Твое́ oру́жие ми́ра, / непобеди́мую побе́ду.

В ЧЕТВЕРГ

АПОСТОЛОВ

Тропарь, глас 3:

Апо́столи святи́и, / моли́те Ми́лостиваго Бо́га, / да прегреше́ний оставле́ние / пода́ст душа́м на́шим.

Тве́рдыя и боговеща́нныя пропове́датели, / верх апо́столов Твои́х, Го́споди, / прия́л еси́ в наслажде́ние благи́х Твои́х и поко́й: / боле́зни бо о́нех и смерть прия́л еси́ па́че вся́каго всепло́дия, / Еди́не, све́дый серде́чная.

И СВЯТИТЕЛЯ НИКОЛАЯ

Пра́вило ве́ры и о́браз кро́тости, / воздержа́ния учи́теля / яви́ тя ста́ду твоему́ / Я́же веще́й И́стина. / Сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га, / спасти́ся душа́м на́шим.

Кондак, глас 3:

В Ми́рех, свя́те, священноде́йствитель показа́лся еси́, / Христо́во бо, преподо́бне, Ева́нгелие испо́лнив, / положи́л еси́ ду́шу твою́ о лю́дех твои́х / и спасл еси́ непови́нныя от сме́рти. / Сего́ ра́ди освяти́лся еси́, / я́ко вели́кий таи́нник Бо́жия благода́ти.

В СУББОТУ,

ВСЕХ СВЯТЫХ И ЗА УМЕРШИХ

Тропари, глас 2:

Апо́столи, му́ченицы и проро́цы, / святи́телие, преподо́бнии и пра́веднии, / до́бре по́двиг соверши́вшии и ве́ру соблю́дшии, / дерзнове́ние иму́ще ко Спа́су, / о нас Того́, я́ко Бла́га, моли́те, / спасти́ся, мо́лимся, душа́м на́шим.

И ныне: Ма́ти Свята́я неизрече́ннаго Све́та, / а́нгельскими Тя пе́сньми почита́юще, / благоче́стно велича́ем.

Кондак, глас 8:

Я́ко нача́тки естества́ Насади́телю тва́ри, / вселе́нная прино́сит Ти, Го́споди, богоно́сныя му́ченики; / тех моли́твами в ми́ре глубо́це / Це́рковь Твою́, жи́тельство Твое́, / Богоро́дицею соблюди́, Многоми́лостиве.

ТРОПАРИ, КОНДАКИ И ВЕЛИЧАНИЯ ОБЩИЕ

Тропарь, глас 4:

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи,// Тя бо и еди́ну наде́жду и́мамы.

Кондак, глас 6:

Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти,/ ускори́ на моли́тву, и потщи́ся на умоле́ние,// предста́тельствующи при́сно, Богоро́дице, чту́щих Тя.

Величания:

Досто́йно есть/ велича́ти Тя, Богоро́дице,/ честне́йшую Херуви́м/ и сла́внейшую// без сравне́ния Серафи́м.

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой Святы́й,/ и́мже то́чиши исцеле́ния// всем с ве́рою притека́ющим.

Святых Бесплотных Сил

Тропарь, глас 4:

Небе́сных во́инств Архистрати́зи,/ мо́лим вас при́сно мы недосто́йнии,/ да ва́шими моли́твами оградите́ нас/ кро́вом крил невеще́ственныя ва́шея сла́вы,/ сохраня́юще нас, припа́дающих приле́жно и вопию́щих:/ от бед изба́вите нас,// я́ко чинонача́льницы вы́шних Сил.

Кондак, глас 2:

Архистрати́зи Бо́жии,/ служи́телие Боже́ственныя сла́вы,/ Ангелов нача́льницы и челове́ков наста́вницы,/ поле́зное нам проси́те и ве́лию ми́лость,// я́ко Безпло́тных Архистрати́зи.

Величание:

Велича́ем вас,/ Арха́нгели и Ангели/ и вся во́инства,/ Херуви́ми и Серафи́ми,// сла́вящия Го́спода.

Святых отцов

Тропарь, глас 8:

Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый/ и те́ми ко и́стинней ве́ре вся ны наста́вивый,// Многоблагоутро́бне, сла́ва Тебе́.

Кондак, глас 8:

Апо́стол пропове́дание и оте́ц догма́ты/ Це́ркве еди́ну ве́ру запечатле́ша,/ я́же и ри́зу нося́щи и́стины, истка́нну от е́же свы́ше богосло́вия,// исправля́ет и сла́вит благоче́стия вели́кое та́инство.

Пророка

Тропарь, глас 2:

Проро́ка Твоего́ (имярек) па́мять, Го́споди, пра́зднующе,/ тем Тя мо́лим:// спаси́ ду́ши на́ша.

Кондак, глас 4:

Просвети́вшееся Ду́хом чи́стое твое́ се́рдце/ проро́чества бысть светле́йшаго прия́телище,/ зри́ши бо я́ко настоя́щая дале́че су́щая,/ сего́ ра́ди тя почита́ем,// проро́че блаже́нне (имярек), сла́вне.

Величание:

Велича́ем тя,/ проро́че Бо́жий (имярек),/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.

Апостола

Тропарь, глас 3:

Апо́столе святы́й (имярек),/ моли́ Ми́лостиваго Бо́га,/ да прегреше́ний оставле́ние// пода́ст душа́м на́шим.

Кондак, глас 4:

Я́ко звезду́ пресве́тлую/ Це́рковь всегда́ стяжа́ тя,/ апо́столе (имярек),/ чуде́с Твои́х многоподава́нием просвеща́ема./ Те́мже зове́м Христу́:/ спаси́ чту́щих ве́рою// па́мять Твоего́ апо́стола, Многоми́лостиве

Величание:

Апостолов

Тропарь, глас 3:

Апо́столи святи́и,/ моли́те Ми́лостиваго Бо́га,/ да прегреше́ний оставле́ние// пода́ст душа́м на́шим.

Кондак, глас 4:

Ло́зие яви́стеся Христо́ва виногра́да, му́дрии,/ гро́здие принося́ще в доброде́телех,/ вино́ нам спасе́ния источа́юще,/ его́же прие́млем, весе́лия исполня́ющеся./ Пра́зднуем честну́ю ва́шу па́мять,/ в ню́же моли́те дарова́тися нам вели́цей ми́лости и отпуще́нию грехо́в,// Госпо́дни апо́столи.

Величание:

Велича́ем вас,/ святи́и апо́столи, весь мир уче́ньми свои́ми просвети́вшия, и вся концы́/ ко Христу́ приве́дшия.

Святителя

Тропарь, глас 4:

Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́/ Я́же веще́й И́стина,/ сего́ ра́ди стяжа́л еси́ смире́нием высо́кая,/ нището́ю бога́тая,/ о́тче (имярек),/ моли́ Христа́ Бо́га// спасти́ся душа́м на́шим.

Кондак, глас 2:

Боже́ственный гром, труба́ духо́вная,/ ве́ры насади́телю и отсека́телю ересе́й,/ Тро́ицы уго́дниче,/ вели́кий святи́телю (имярек),/ со А́нгелы предстоя́ при́сно,// моли́ непреста́нно о всех нас.

Величание:

Велича́ем тя,/ святи́телю о́тче (имярек), /и чтим святу́ю па́мять твою́,/ ты бо мо́лиши о нас// Христа́ Бо́га на́шего.

Святителей

Тропарь, глас 4:

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их// в ми́ре упра́ви живо́т наш.

Кондак, глас 8:

Я́ко доброде́телей учи́телие и иера́рхов украше́ние,/ Це́рковь пою́щи вас сла́вит,/ моли́твами ва́шими пода́йте чту́щим вас любо́вию/ доброде́телей исправле́ние и собла́знов избавле́ние,// я́ко непобеди́мии.

Величание:

Велича́ем вас,/ святи́телие вели́цыи, и чтим святу́ю па́мять ва́шу, вы бо мо́лите за нас/ Христа́ Бо́га на́шего.

Мученика

Тропарь, глас 4:

Му́ченик Твой, Го́споди, (имярек)/ во страда́нии свое́м вене́ц прия́т нетле́нный от Тебе́, Бо́га на́шего,/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.

Кондак, глас 2:

Звезда́ све́тлая яви́лся еси́,/ непреле́стная ми́рови,/ Со́лнца Христа́ возвеща́ющи,/ заря́ми Твои́ми, страстоте́рпче (имярек),/ и пре́лесть погаси́л еси́ всю,/ нам же подае́ши свет,// моля́ся непре­ста́нно о всех нас.

Величание:

Велича́ем тя,/ страстоте́рпче святы́й (имярек),/ и чтим честна́я страда́ния твоя́,/ я́же за Христа́// претерпе́л еси́.

Мученика XX века

Тропарь (см. общий мученика) Кондак, глас 5:

Ве́рный сын земли́ Ру́сския яви́лся еси́,/ новому́чениче (имярек),/ Христа́, Со́лнце Пра́вды, возвеща́я/ и безбо́жия тьму́ отгоня́я./ Ны́не же сро́дники твоя́ в правосла́вней ве́ре утвержда́я,// моли́ся о душа́х на́ших.

Величание: (см. общее мученика)

Мученицы

Тропарь, глас 4:

А́гница Твоя́, Иису́се, (имярек)/ зове́т ве́лиим гла́сом:/ Тебе́, Женише́ мой, люблю́,/ и, Тебе́ и́щущи, страда́льчествую/ и сраспина́юся и спогреба́юся Креще́нию Твоему́,/ и стражду́ Тебе́ ра́ди, я́ко да ца́рствую в Тебе́,/ и умира́ю за Тя, да и живу́ с Тобо́ю,/ но я́ко же́ртву непоро́чную приими́ мя, с любо́вию поже́ршуюся Тебе́.// Тоя́ моли́твами, я́ко Ми́лостив, спаси́ ду́ши на́ша.

Кондак, глас 2:

Храм Твой всечестны́й я́ко цельбу́ душе́вную обре́тше,/ вси ве́рнии велегла́сно вопие́м ти:/ де́во му́ченице (имярек) великоимени́тая,// Христа́ Бо́га моли́ непреста́нно о всех нас.

Величание:

Велича́ем тя,/ страстоте́рпице Христо́ва (имярек),/ и чтим честно́е страда́ние твое́,/ е́же за Христа́// претерпе́ла еси́.

Мученицы XX века

Тропарь, глас 4:

Благоче́стно в зако́не Госпо́дни пожи́вши,/ ве́ру правосла́вную сохрани́ла еси́,/ и терпе́нием гони́тели Це́ркве Ру́сския посрами́вши,/ сме́рть за Христа́ прия́ла еси́,/ му́ченице сла́вная (имярек),/ престо́лу Бо́жию предстоя́щи,// моли́ спасти́ся душа́м на́шим.

Кондак, глас 5: Величание:

Велича́ем тя,/ свята́я му́ченице (имярек),/ и чтим честна́я страда́ния твоя́,/ я́же за Христа́// претерпе́ла еси́.

Мучеников

Тропарь, глас 4:

Мученицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами// спаси́ ду́ши на́ша.

Кондак, глас 2:

Свети́льницы све́тлии я́вльшеся, боже́ственнии му́ченицы,/ тварь всю све́тлостию чуде́с озаря́ете,/ неду́ги разреша́юще и глубо́кую тьму всегда́ отгоня́юще,// Христу́ Бо́гу моля́щеся непреста́нно о всех нас.

Величание:

Велича́ем вас,/ страстоте́рпцы святи́и,/ и чтим честна́я страда́ния ва́ша,/ я́же за Христа́// претерпе́ли есте́.

Мучениц

Тропарь, глас 1:

А́гницы слове́сныя А́гнцу и Па́стырю,/ приведо́стеся муче́нием ко Христу́,/ тече́ние сконча́вше/ и ве́ру соблю́дше,/ те́мже днесь ра́достною душе́ю соверша́ем, досточу́днии, святу́ю ва́шу па́мять,// Христа́ велича́юще.

Кондак, глас 4:

Страстоте́рпиц Христо́вых па́мять пра́зднуим,/ и ве́рою прося́ще по́мощи/ изба́витися всем от вся́кия ско́рби, зову́ще:/ Бог наш с на́ми,// Иже сих просла́вивый, я́коже изво́ли.

Величание:

Велича́ем вас,/ страстоте́рпицы святы́я,/ и чтим честна́я страда́ния ва́ша,/ я́же за Христа́// претерпе́ли есте́.

Священномученика

Тропарь, глас 4:

И нра́вом прича́стник,/ и престо́лом наме́стник апо́столом быв,/ дея́ние обре́л еси́, богодухнове́нне,/ в виде́ния восхо́д:/ сего́ ра́ди сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче (имярек),/ моли́ Христа́ Бо́га// спасти́ся душа́м на́шим.

Кондак, глас 4:

Во святи́телех благоче́стно пожи́в/ и муче́ния путь проше́д,/ и́дольския угаси́л еси́ же́ртвы,/ и побо́рник быв твоему́ ста́ду, богому́дре./ Те́мже тя почита́юще, та́йно вопие́м ти:/ от бед изба́ви ны при́сно твои́ми мольба́ми,// о́тче наш (имярек).

Величание:

Велича́ем тя,/ священному́чениче (имярек),/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.

Священномученика XX века

Тропарь, глас 3:

Це́ркве Ру́сския сто́лпе непоколеби́мый,/ благоче́стия пра́вило,/ жития́ ева́нгельскаго о́бразе,/ священному́чениче (имярек),/ Христа́ ра́ди пострада́вый да́же до кро́ве, Его́же моли́ усе́рдно, я́ко Нача́льника и Соверши́теля спасе́ния, Русь Святу́ю утверди́ти в Правосла́вии/ до сконча́ния ве́ка.

Кондак, глас 2:

Восхва́лим, ве́рнии, изря́днаго во святи́телех (или́ свяще́нницех) и сла́внаго в му́ченицех (имярек), Правосла́вия побо́рника и благоче́стия ревни́теля, земли́ Ру́сския кра́сное прозябе́ние, и́же страда́нием Небе́с дости́же и та́мо те́пле мо́лит Христа́ Бо́га/ спасти́ся душа́м на́шим.

Величание:

Велича́ем тя,/ священному́чениче (имярек),/ и чтим честна́я страда́ния твоя́,/ я́же за Христа́/ во утвержде́ние на Руси́ Правосла́вия/ претерпе́л еси́.

Священномучеников

Тропарь, глас 4:

Бо́же оте́ц на́ших,/ творя́й при́сно с на́ми по свое́й кро́тости,/ не отста́ви ми́лость Твою́ от нас,/ но моли́твами их// в ми́ре упра́ви живо́т наш.

Кондак, глас 3:

Я́ко свети́льницы незаходи́мии разу́мнаго со́лнца,/ соше́дшеся днесь восхва́лим пе́сньми,/ возсия́ли бо есте́ су́щим во тьме неразу́мия,/ всех созыва́юще к высоте́ благоче́стия, священному́ченицы./ Тем вопие́м вам:// ра́дуйтеся, по́стников всех основа́ние.

Величание:

Велича́ем вас,/ священному́ченицы Христо́вы, и чтим святу́ю па́мять ва́шу, вы бо мо́лите за нас/ Христа́ Бо́га на́шего.

Преподобномученика

Тропарь (см. общий преподобного) Кондак, глас 2:

Яко по́стника благоче́стна, и иску́сна,/ и страда́льца произволе́нием че́стна,/ и пусты́ни жи́теля сообра́зна,/ в пе́снех досто́йно восхва́лим (имярек) приснохва́льнаго,// то́й бо зми́я попра́л есть.

Величание:

Ублажа́ем тя,/ преподобному́чениче (имярек),/ и чтим святу́ю па́мять твою́,/ наста́вниче мона́хов// и собесе́дниче Ангелов.

Преподобномученика XX века

Тропарь, глас 1:

Ве́рный учени́к Христа́ да́же до сме́рти бы́в,/ преподобному́чениче (имярек) приснопа́мятне,/ по́двиги бо поста́ и кро́вию муче́ний/ зе́млю Ру́сскую освяти́л еси́./ Те́мже и мы, ча́да твоя́, любо́вию вопие́м ти:/ сла́ва Да́вшему ти кре́пость,/ сла́ва Венча́вшему тя,// сла́ва Просла́вльшему тя с новому́ченики Росси́йскими.

Кондак, глас 3:

Мирска́го мяте́жа удали́вся,/ до́бре Бо́гу послуж(имярек),/ сохрани́тися ей в Правосла́вии и благочестии// до сконча́ния ве́ка.

Величание:

Велича́ем тя,/ преподобному́чениче (имярек),/ и чти́м по́двиги и страда́ния твоя́,/ я́же за Христа́// претерпе́л еси́.

Преподобномученицы

Тропарь, глас 4:

Агница Твоя́, Иису́се… (см. общий мученицы)

Кондак, глас 4:

Боже́ственная па́мять твоя́, (имярек), днесь возсия́вши, / яви́ся ми́рови я́ко со́лнце,/ сказу́ющи житие́ твое́:/ ты́ бо воздержа́нием плотска́я двиза́ния разо́рши,/ и страда́ния кро́вию уневе́стилася еси́ Христо́ви./ Те́мже хва́лящия тя изба́ви от вся́ких зол, да зове́м ти:// ра́дуйся, ма́ти преподо́бная.

Величание:

Велича́ем тя,/ страстоте́рпице святая (имярек),/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.

Преподобномученицы XX века

Тропарь, глас 5:

Христа́ Го́спода Иису́са ве́рная учени́це,/ Це́ркве Росси́йския избра́нная а́гнице,/ преподо́бная страстоте́рпице (имярек),/ ле́гкое и́го и я́звы Его́ любо́вию нося́щи,/ ле́ствицею муче́ний/ к Нему́, я́ко Небе́сному Жениху́, востекла́ еси́,/ Его́же моли́ сохрани́ти в благоче́стии лю́ди Росси́йския// и спасти́ ду́ши на́ша.

Кондак, глас 4:

Я́ко крин багрянови́дный,/ посреде́ те́рний безбо́жия/ в земне́м оте́честве твое́м процвела́ еси́,/ преподобному́ченице (имярек) честна́я,/ по́двиги воздержа́ния страда́нием украси́вши,/ востекла́ еси́ к Небе́сному Жениху́ Христу́,// И́же увенча́ тя красото́ю сла́вы нетле́нныя.

Величание:

Велича́ем тя,/ страстоте́рпице преподо́бная ма́ти (имярек),/ и чтим честна́я страда́ния твоя́,/ я́же за Христа́/ во утвержде́ние на Руси́ Правосла́вия// претерпе́ла еси́/

Преподобномучеников

Тропарь, глас 4:

Бо́же оте́ц на́ших,/ творя́й при́сно с на́ми по свое́й кро́тости,/ не отста́ви ми́лость Твою́ от нас,/ но моли́твами их// в ми́ре упра́ви живо́т наш.

Кондак, глас 2:

Волне́ний мно́жество невла́жно проходя́ще,/ безпло́тныя враги́ струя́ми слез ва́ших кре́пко погрузи́ли есте́,/ богому́дрии и преподо́бнии,/ и чуде́с дар прии́мше,// моли́те непреста́нно о всех нас.

Величание:

Ублажа́ем вас,/ преподо́бнии му́ченицы, и чтим святу́ю па́мять ва́шу,/ наста́вницы мона́хов,/ и собесе́дницы Ангелов.

Священноисповедника и преподобноисповедника

Тропарь, глас 8:

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ архиере́ев богодухнове́нное удобре́ние,/ (имярек) прему́дре,/ уче́ньми твои́ми вся просвети́л еси́, цевни́це духо́вная,// моли́ Христа́ Бо́га спасти́ся душа́м на́шим.

Кондак, глас 2: Величание священноисповедника (см. общее святителя) Величание преподобноисповедника (см. общее преподобного)

Священноисповедника XX века

Тропарь, глас 2:

Священноиспове́дниче о́тче (имярек),/ во дни́ гоне́ний безбо́жных на Це́рковь Ру́сскую/ поноше́ния, заточе́ние, изгна́ние и го́рькия работы/ Христа́ ра́ди претерпе́л еси́,/ и ничто́же разлучи́ тя от любве́ Бо́жия./ Та́же благоче́стно в ми́ре пожи́в,/ свиде́тельствовал еси́ Го́спода Иису́са Христа́,// Его́же моли́ спасти́ся душа́м на́шим.

Кондак, глас 2:

Я́ко звезда́ но́вая Це́ркве Ру́сския яви́лся еси,/ терпеливоду́шне (имярек) священноиспове́дниче,/ Христа́ Бо́га прославля́я/ и в нощи́ безбо́жия путь ве́рным указу́я./ Те́мже мо́лим тя:/ моли́ нам, сро́дником твои́м,/ в ве́ре правосла́вней утверди́тися// и спасти́ся душа́м на́шим.

Величание:

Велича́ем тя,/ священноиспове́дниче (имярек),/ и чтим святу́ю па́­мять твою́,/ ты бо мо́лиши за нас// Христа́ Бо́га на́шего.

Преподобноисповедника XX века

Тропарь, глас 2:

Преподобноиспове́дниче о́тче (имярек),/ во дни гоне́ний безбо́жных на Це́рковь Ру́сскую/ поноше́ния, заточе́ние, изгна́ние и го́рькия рабо́ты/ Христа́ ра́ди претерпе́л еси́,/ и ничто́же разлучи́ тя от любве́ Бо́жия./ Та́же благоче́стно в ми́ре пожи́в,/ свиде́тельствовал еси́ Го́спода Иису́са Христа́,// Его́же моли́ спасти́ся душа́м на́шим.

Кондак, глас 2:

Я́ко звезда́ но́вая Це́ркве Ру́сския яви́лся еси,/ терпеливоду́шне (имярек) преподобноиспове́дниче,/ Христа́ Бо́га прославля́я/ и в нощи́ безбо́жия путь ве́рным указу́я./ Те́мже мо́лим тя:/ моли́ нам, сро́дником твои́м,/ в ве́ре правосла́вней утверди́тися// и спасти́ся душа́м на́шим.

Величание:

Преподобноисповедницы XX века

Тропарь, глас 5:

Христа́ Го́спода Иису́са ве́рная учени́це,/ Це́ркве Росси́йския избра́нная а́гнице,/ преподо́бная ма́ти (имярек),/ ле́гкое и́го и я́звы Госпо́дни любо́вию нося́щи,/ ле́ствицею доброде́телей и испове́данием ве́ры/ к Нему́ я́ко Небе́сному Жениху́ востекла́ еси́,/ Его́же моли́ сохрани́ти в благоче́стии лю́ди росси́йския// и спасти́ ду́ши на́ша.

Кондак, глас 4:

Я́ко кри́н благоуха́нный,/ посреде́ пусты́ни безбо́жия/ в земне́м Оте́честве твое́м процвела́ еси́, преподо́бная ма́ти (имярек),/ и по́двиги воздержа́ния испове́данием ве́ры украси́вши,/ востекла́ еси́ к Небе́сному Жениху́ Христу́,// И́же увенча́ тя красото́ю сла́вы нетле́нныя.

Величание:

Велича́ем тя,/ страстоте́рпице преподо́бная ма́ти (имярек),/ и чтим честна́я страда́ния твоя́,/ я́же за Христа́/ во утвержде́ние на Руси́ Правосла́вия// претерпе́ла еси́.

Исповедника XX века

Тропарь, глас 4:

Страда́ния за Христа́ претерпе́в,/ ве́ру правосла́вную сохрани́л еси́,/ и терпе́нием гони́тели Це́ркве Ру́сския посрами́в,/ благоче́стно в зако́не Госпо́дни пожи́л еси́,/ испове́дниче сла́вне (имярек),/ Престо́лу Бо́жию предстоя́,// моли́ спасти́ся душа́м на́шим.

Кондак, глас 2:

Я́ко звезда́ но́вая Це́ркве Ру́сския яви́лся еси́,/ терпеливоду́шне (имярек) испове́дниче,/ Христа́ Бо́га прославля́я/ и в нощи́ безбо́жия путь ве́рным указу́я./ Те́мже мо́лим тя:/ моли́ нам, сро́дником твои́м,/ в ве́ре правосла́вней утверди́тися// и спасти́ся душа́м на́шим.

Величание:

Велича́ем тя,/ испове́дниче святы́й (имярек),/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.

Исповедницы XX века

Тропарь, глас 4:

Благоче́стно в зако́не Госпо́дни пожи́вши,/ ве́ру правосла́вную сохрани́ла еси́,/ и терпе́нием гони́тели Це́ркве Ру́сския посрами́вши,/ страда́ния за Христа́ претерпе́ла еси́,/ испове́днице сла́вная (имярек),/ престо́лу Бо́жию предстоя́щи,// моли́ спасти́ся душа́м на́шим.

Кондак, глас 4:

Я́ко кри́н благоуха́нный,/ посреде́ пусты́ни безбо́жия/ в земне́м Оте́честве твое́м процвела́ еси́,/ блаже́нная ма́ти (имярек),/ и житие́ доброде́тельное испове́данием ве́ры украси́вши,/ востекла́ еси́ к Небе́сному Жениху́ Христу́,// И́же увенча́ тя красото́ю сла́вы нетле́нныя.

Величание:

Велича́ем тя,/ испове́днице Христо́ва (имярек),/ и чтим святу́ю па́мять твою́,/ ты бо мо́лиши за нас// Христа́ Бо́га на́шего.

Преподобного

Тропарь, глас 8:

В тебе́, о́тче, изве́стно спасе́ся е́же по о́бразу:/ прии́м бо Крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней,// те́мже и со А́нгелы сра́дуется, преподо́бне (имярек), дух твой.

Ин тропарь, глас тот же:

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоно́сил еси,/ и был еси́ свети́льник вселе́нней, сия́я чудесы́, (имярек), о́тче наш,// моли́ Христа́ Бо́га спасти́ся душа́м на́шим.

Ин тропарь, глас 1:

Пусты́нный жи́тель, и в телеси́ А́нгел,/ и чудотво́рец яви́лся еси́, богоно́се о́тче наш (имярек):/ посто́м, бде́нием, моли́твою небе́сная дарова́ния прии́м,/ исцеля́еши неду́жныя и ду́ши ве́рою притека́ющих ти./ Сл́ава Да́вшему тебе́ кре́пость,/ сла́ва Венча́вшему тя,// сла́ва Де́йствующему тобо́ю всем исцеле́ния.

Кондак, глас 2:

Чистото́ю душе́вною боже́ственне вооружи́вся,/ и непреста́нныя моли́твы я́ко копие́ вручи́в кре́пко,/ пробо́л еси́ бесо́вская ополче́ния,/ (имярек), о́тче наш,// моли́ непреста́нно о всех нас.

Величание:

Ублажа́ем тя,/ преподо́бне о́тче (имярек),/ и чтим святу́ю па́мять твою́,/ наста́вниче мона́хов// и собесе́дниче Ангелов.

Преподобной

Тропарь, глас 8:

В тебе́, ма́ти, изве́стно спасе́ся е́же по о́бразу:/ прии́мши бо крест, после́довала еси́ Христу́,/ и де́ющи учи́ла еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней,// те́мже и со Ангелы сра́дуется, преподо́бная (имярек), дух твой.

Кондак, глас 2:

За любо́вь Госпо́дню, преподо́бная,/ поко́я жела́ние возненави́дела еси́,/ поще́нием дух твой просвети́вши:/ кре́пко бо зве́ри победи́ла еси́;/ но моли́твами твои́ми// проти́вных шата́ние разори́.

Величание:

Ублажа́ем тя,/ преподо́бная ма́ти (имярек),/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.

Преподобных жен

Тропарь, глас 2:

И́стинному жела́нию уневе́стившеся, христосла́внии,/ и вре́меннаго обру́чника отве́ргшеся совокупле́ния,/ и доброде́тельными по́двиги возра́стше,/ на высоту́ востеко́сте нетле́ния,/ красноду́шнии и многобога́тнии,/ столпи́ мона́шествующих жен и пра́вило,/ те́мже о нас моли́те непреста́нно,// любо́вию ва́шу па́мять пра́зднующих.

Кондак, глас 2:

Телеса́ своя́ посто́м изнури́вше,/ и неусы́пными моли́твами моля́ще Зижди́теля о гресе́х свои́х,/ я́ко да прии́мете соверше́нное проще́ние,/ и прия́сте боже́ственное оставле́ние/ и ца́рствие небе́сное,// моли́те Христа́ Бо́га о всех нас.

Величание:

Ублажа́ем вас,/ преподо́бнии ма́тери, и чтим святу́ю па́мять ва́шу, вы бо мо́лите за нас// Христа́ Бо́га на́шего.

Бессребреников

Тропарь, глас 8:

Святи́и безсре́бреницы и чудотво́рцы,/ посети́те не́мощи на́ша:// ту́не прия́сте, ту́не дади́те нам.

Кондак, глас 2:

Благода́ть прии́мше исцеле́ний,/ простира́ете здра́вие су́щим в ну́ждах,/ вра́чеве, чудотво́рцы пресла́внии,/ но ва́шим посеще́нием/ ра́тников де́рзости низложи́те,// мир исцеля́юще чудесы́.

Величание:

Велича́ем вас,/ чудотво́рцы сла́внии (имярек),/ и чтим честна́я страда́ния ва́ша,/ я́же за Христа́// претерпе́ли есте́.

Христа ради юродивого

Тропарь, глас 1: Кондак, глас 8:

Вы́шния красоты́ жела́я,/ ни́жния сла́сти теле́сныя то́щно оста́вил еси́,/ нестяжа́нием су́етнаго ми́ра, А́нгельское житие́ проходя́,/ сконча́вся, (имярек) блаже́нне,// с ни́миже Христа́ Бо́га моли́ непреста́нно о всех нас.

Величание:

Ублажа́ем тя,/ святы́й пра́ведный (имярек),/ и чтим свя­ту́ю па́мять твою́,/ ты бо мо́лиши о нас// Христа́ Бо́га на́шего.