Канон на Воздвижение Креста Господня

Песнь 1

Ирмос: Крест начертав Моисей впрямо жезлом, Чермное пресече Израилю пешеходящу: тойже обратно, фараоновым колесницам ударив совокупи, вопреки написав непобедимое оружие. Тем Христу поим Богу нашему, яко прославися.

Припев: Слава, Господи, Кресту Твоему Честному.

Образ древле Моисей пречистыя страсти в себе самом прообрази, священных среде стоя: Крест же вообразив, простертыми победу дланьми воздвиже, державу погубив Амалика всегубителя. Тем Христу поим, Богу нашему, яко прославися. (Дважды).

Слава: Возложи Моисей на столпе врачевство, тлетвориваго избавления и ядовитаго угрызения, и древу образом креста, по земли пресмыкающагося змия привяза, лукавный в сем обличив вред. Тем Христу поим, Богу нашему, яко прославися.

И ныне: Показа небо Креста победу благочестия держателю и царю богомудру, врагов в немже злосердных низложися свирепство, лесть же превратися, и вера распростреся земным концем Божественная. Тем Христу поим, Богу нашему, яко прославися.

Песнь 3

Ирмос: Жезл во образ тайны приемлется, прозябением бо предразсуждает священника: неплодящей же прежде церкви, ныне процвете древо Креста в державу и утверждение.

Слава, Господи, Кресту Твоему Честному.

Яко испусти ударяемь воду краесекомый непокоривым людем и жестосердым, богозванныя проявляше Церкве таинство, еяже Крест держава и утверждение. (Дважды).

Слава: Ребром пречистым, копием прободенным, вода с кровию истече, обновляющая завет, и омывательная греха: верных бо Крест похвала и царей держава и утверждение.

И ныне: Ребром пречистым, копием прободенным, вода с кровию истече, обновляющая завет, и омывательная греха: верных бо Крест похвала и царей держава и утверждение.

Господи, помилуй. (Трижды.) Слава, и ныне:

Седален, Глас 4-й

В тебе, треблаженне и жизнодавче Кресте, людие учреждающеся, спразднуют с невещественными лики; чини архиерейстии благоговейно воспевают, множество же монашествующих и постников покланяются, Христа же распеншагося вси славим.

Песнь 4

Ирмос: Услышах, Господи, смотрения Твоего таинство, разумех дела Твоя, и прославих Твое Божество.

Слава, Господи, Кресту Твоему Честному.

Горькородныя преложи древом Моисей источники в пустыни древле, Крестом ко благочестию языков проявляя преложение.

Слава, Господи, Кресту Твоему Честному.

Глубине внедривый секущую, издаде Иордан древу, Крестом и крещением сечение лести знаменуя.

Слава: Священно ополчаются четверочастнии людие, предходяще образом свидетельства скинии, крестообразными чинми прославляеми.

И ныне: Чудно простираемь, солнечныя лучи испущаше Крест, и поведаша небеса славу Бога нашего.

Песнь 5

Ирмос: О, треблаженное Древо, на немже распяся Христос, Царь и Господь, имже паде древом прельстивый, тобою прельстився, Богу пригвоздившуся плотию, подающему мир душам нашим.

Слава, Господи, Кресту Твоему Честному.

Тебе, приснопетое Древо, на немже простреся Христос, Едем хранящее обращающееся оружие, Кресте, устыдеся: страшный же Херувим уступи на тебе пригвожденному Христу, подающему мир душам нашим. (Дважды).

Слава: Подземных силы противныя Креста страшатся начертаема знамения на воздусе, по немуже ходят небесных и земнородных роди, колена преклоняюше Христу, подающему мир душам нашим.

И ныне: Зарями нетленными явлься Божественний Крест омраченным языком, заблужденным в прелести, Божественный свет облистав, усвояет на нем пригвожденному Христу, подающему мир душам нашим.

Песнь 6

Ирмос: Воднаго зверя во утробе, длани Иона крестовидно распростер, спасительную страсть проображашe яве. Тем тридневен исшед, премирное Воскресение прописаше, плотию пригвожденнаго Христа Бога, и тридневным Воскресением мир просвещшаго.

Слава, Господи, Кресту Твоему Честному.

Старостию преклонився, и недугом отягчен исправися Иаков, руце пременив, действие являя жизноноснаго Креста: ибо ветхость законнаго сеновнаго писания новописа, на сем плотию пригвоздивыйся Бог, и душегубительный недуг лести отгна. (Дважды).

Слава: На юныя возложив длани Божественный Израиль, крестовидно главы являше, яко старейшая слава, законослужители людие. Темже подмневся тако испрельститися, не измени жизноноснаго образа: превзыдут бо людие Христовы Божии, новоутверждении, вопияше, Крестом ограждаеми.

И ныне: На юныя возложив длани божественный Израиль, крестовидно главы являше, яко старейшая слава, законослужители людие: темже подмневся тако испрельститися, не измени жизноноснаго образа: превзыдут бо людие Христовы Божии, новоутверждении, вопияху, Крестом ограждаеми.

Господи, помилуй. (Трижды.) Слава, и ныне:

Кондак, глас 4-й

Вознесыйся на Крест волею, тезоименитому Твоему новому жительству щедроты Твоя даруй, Христе Боже, возвесели нас силою Твоею, победы дая нам на супостаты, пособие имущу Твое, оружие мира, непобедимую победу.

Икос

Иже до третияго небесе восхищен бысть в рай, и глаголы слышав неизреченныя и Божественныя, ихже не леть языки (человеческими) глаголати, что Галатом пишет, яко рачитилие писаний прочтосте и познасте: мне, глаголет, хвалитися да не будет, токмо во едином Кресте Господни, на немже страдав уби страсти. Того убо и мы известно держим, Крест Господень, хвалу вси, есть бо нам спасительное сие Древо, оружие мира, непобедимая победа.

Песнь 7

Ирмос: Безумное веление мучителя злочестиваго люди поколеба, дышущее прещение и злохуление богомерзкое, обаче три отроки не устраши ярость зверская, ни огнь снедаяй, но противодышущу росоносному духу, со огнем сущу пояху: препетый отцев и нас Боже благословен еси.

Слава, Господи, Кресту Твоему Честному.

От древа вкусив первый в человецех, в тление вселися: отвержением бо жизни безчестнейшим осудився, всему роду телотленен некий, яко вред недуга преподаде. Но обретше земнороднии воззвание крестным Древом, зовем: препетый отцев и нас Боже благословен еси. (Дважды).

Слава: Разруши повеление Божие преслушание, и древо принесе смерть человеком, еже неблаговременно причастно бывшeе: во утверждение же зело честнаго, оттуду жизни древо возбраняемо бе, еже разбойнику злоумершу отверзе, благоразумно зовущу: препетый отцев и нас Боже благословен еси.

И ныне: Жезла объемлет край Иосифова будущая зря Израиль, царствия державное, яко возъимуществит преславный Крест, проявляя. Сей бо царей победоносная похвала, и свет верою зовущим: препетый отцев и нас Боже, благословен еси.

Песнь 8

Ирмос: Благословите отроцы, Троицы равночисленнии, содетеля Отца Бога, пойте снизшедшее Слово, и огнь в росу претворшее, и превозносите всем жизнь подаваюшаго Духа Всесвятаго, во веки.

Слава, Господи, Кресту Твоему Честному.

Воздвизаему Древу, окроплену Кровию воплощшагося Слова Бога, пойте небесныя силы, земных воззвание празднующе людие, поклонитеся Христову Кресту, имже миру востание во веки. (Дважды).

Слава: Земнороднии дланьми, строителие благодати Крест, на немже стояше Христос Бог, возносите священнолепно, и копие, Божия Слова Тело прободшее. Да видят языцы вси спасение Божие, славяще Его во веки.

И ныне: Божественным судом предъизбрании веселитеся христианстии вернии царие хвалитеся победоносным оружием, приемше от Бога Крест Честный: в сем бо колена, браней дерзости ищуще, разсыпаются во веки.

Песнь 9

Ирмос: Таин еси, Богородице, рай, невозделанно возрастивший Христа, Имже крестное живоносное на земли насадися Древо, тем ныне возносиму, покланяющеся Ему, Тя величаем.

Слава, Господи, Кресту Твоему Честному.

Да возрадуются древа дубравная вся, освятившуся естеству их, от Негоже из начала насадишася, Христу распростершуся на Древе. Тем ныне возносиму покланяющеся Ему, Тя величаем.

Слава, Господи, Кресту Твоему Честному.

Священный воста рог, и глава всем богомудрым Крест, имже грешных мысленно стираются роги вси. Тем ныне возносиму, покланяющеся Ему, Тя величаем.

Ирмос: Снедию древа роду прибывшая смерть, Крестом упразднися днесь: ибо праматерняя всеродная клятва разрушися, прозябением чистыя Богоматере, Юже вся силы небесныя величают.

Горести убийственныя, яже от древа не оставив, Господи, Крестом бо сию совершенно истребил еси. Сего ради и древом услади иногда горесть вод Мерры, прообразующее Креста действо, еже вся силы небесныя величают.

Слава: Непрестанно гружаемыя мраком праотца, Господи, Крестом возвысил еси днесь: яко бо лестию весьма неудержанно естество преднизведеся, всеродне ны паки исправи свет Креста Твоего, Егоже вернии величаем.

И ныне: Да образ покажеши миру покланяемый Господи, Креста, во всех, яко преславный на небесех изобразил еси, светом безмерным озарен, царю всеоружие непобедимое. Тем Тя вся силы небесныя величают.

Задостойник, глас 8-й

Таин еси, Богородице, рай, невозделанно возрастивший Христа, Имже Крестное живоносное на земли насадися древо. Тем ныне возносиму покланяющеся ему, Тя величаем.

Величание

Величаем Тя, Живодавче Христе, и чтим Крест Твой святый, имже нас спасл еси от работы вражия.

Всемирному Воздвижению Честнаго и Животворящаго Креста.

27 сентября.

Тропа́рь, гла́с 1:

Спаси́, Го́споди, лю́ди Твоя́ и благослови́ достоя́ние Твое́, побе́ды на сопроти́вныя да́руя и Твое́ сохраня́я Кресто́м Твои́м жи́тельство.

Стихи́ры, гла́с 6.

Кре́ст воздвиза́емь / на не́м Вознесе́ннаго / Стра́сть пречи́стую / пе́ти повелева́ет тва́ри все́й. / На то́м бо уби́в на́с уби́вшаго, / умерщвле́нныя оживи́л е́сть, / и удобри́, и на небесе́х жи́ти сподо́би, я́ко Милосе́рд, / премно́жеством бла́гости. / Те́м, ра́дующеся, / вознесе́м и́мя Его́, / и Того́ возвели́чим / кра́йнее снизхожде́ние.

Моисе́й предобрази́ тя, / ру́ки просте́р на высоту́, / и побежда́ше Амали́ка мучи́теля, / Кре́сте честны́й, ве́рных похвало́, / страда́льцев утвержде́ние, / апо́столов удобре́ние, / пра́ведных побо́рниче, / все́х преподо́бных спаси́телю. / Те́м, тя́ воздвиза́ема, / зря́щи тва́рь, весели́тся / и торжеству́ет, сла́вящи Христа́, / тобо́ю разстоя́щая собра́вшаго / кра́йнею бла́гостию.

Кре́сте пречестны́й, / его́же обстоя́т чи́ни Ангельстии, веселя́щеся, / дне́сь воздвиза́емь, / Боже́ственным манове́нием возно́сиши вся́ / окраде́нием сне́ди отгна́нныя / и в сме́рть попо́лзшияся. / Те́мже тя́ сердцы́ и устна́ми, / ве́рнии, лобыза́юще, / свяще́ние почерпа́ем, / возноси́те, вопию́ще, / Христа́, Преблага́го Бо́га, / и Того́ покланя́йтеся Боже́ственному подно́жию.

Сла́ва, и ны́не, гла́с 2:

Прииди́те, вси́ язы́цы, благослове́нному дре́ву поклони́мся, и́мже бы́сть ве́чная пра́вда: пра́отца бо Ада́ма прельсти́вый дре́вом, Кресто́м прельща́ется, и па́дает низве́ржен паде́нием стра́нным, мучи́тельством одержа́вый ца́рское зда́ние; Кро́вию Бо́жиею я́д зми́ев отмыва́ется, и кля́тва разруши́ся осужде́ния пра́веднаго, непра́ведным судо́м Пра́веднику осужде́ну бы́вшу; Дре́вом бо подоба́ше дре́во исцели́ти и Стра́стию Безстра́стнаго, я́же на Дре́ве, разреши́ти стра́сти осужде́ннаго. Но сла́ва, Христе́ Царю́, е́же о на́с Твоему́ му́дрому смотре́нию, и́мже спа́сл еси́ все́х, я́ко Бла́г и Человеколю́бец.

Стихи́ра, гла́с 6:

Кре́сте Христо́в, христиа́н упова́ние, заблу́ждших наста́вниче, обурева́емых приста́нище, в бра́нех побе́да, вселе́нныя утвержде́ние, неду́жных врачу́, ме́ртвых воскресе́ние, поми́луй на́с.

Кано́н Креста́, гла́с 8.

Пе́снь 1.

Ирмос: Кре́ст начерта́в, Моисе́й впря́мо жезло́м Чермно́е пресече́, Изра́илю пешеходя́щу; то́же обра́тно фарао́новым колесни́цам, уда́рив, совокупи́, вопреки́ написа́в непобеди́мое ору́жие. Те́м Христу́ пои́м, Бо́гу на́шему, я́ко просла́вися.

Образ дре́вле Моисе́й пречи́стыя Стра́сти в себе́ само́м прообрази́, свяще́нных среде́ стоя́: Кре́ст же вообрази́в, просте́ртыми побе́ду дла́ньми воздви́же, держа́ву погуби́в Амали́ка всегуби́теля. Те́м Христу́ пои́м, Бо́гу на́шему, я́ко просла́вися.

Возложи́ Моисе́й на столпе́ врачевство́, тлетвори́ваго избавле́ние и ядови́таго угрызе́ния, и дре́ву о́бразом Креста́ по земли́ пресмыка́ющагося зми́я привяза́, лука́вный в се́м обличи́в вре́д. Те́м Христу́ пои́м, Бо́гу на́шему, я́ко просла́вися.

Показа́ не́бо Креста́ побе́ду благоче́стия держа́телю и царю́ богому́дру, враго́в в не́мже злосе́рдных низложи́ся свире́пство, ле́сть же преврати́ся, и ве́ра распростре́ся земны́м конце́м Боже́ственная. Те́м Христу́ пои́м, Бо́гу на́шему, я́ко просла́вися.

Пе́снь 3.

Ирмос: Же́зл во о́браз та́йны прие́млется, прозябе́нием бо предразсужда́ет свяще́нника; неплодя́щей же пре́жде Це́ркви, ны́не процвете́ Дре́во Креста́, в держа́ву и утвержде́ние.

Яко испусти́, ударя́емь, во́ду краесеко́мый, непокори́вым лю́дем и жестосе́рдым, богозва́нныя проявля́ше Це́ркве та́инство, ея́же Кре́ст держа́ва и утвержде́ние.

Ре́бром пречи́стым, копие́м прободе́нным, вода́ с Кро́вию истече́, обновля́ющая Заве́т и омыва́тельная греха́; ве́рных бо Кре́ст похвала́ и царе́й держа́ва и утвержде́ние.

Седа́лен, гла́с 4.

В тебе́, треблаже́нне и жизнода́вче Кре́сте, лю́дие учрежда́ющеся, спра́зднуют с невеще́ственными ли́ки, чи́ни архиере́йстии благогове́йно воспева́ют, мно́жество же мона́шествующих и по́стников покланя́ются, Христа́ же распе́ншагося вси́ сла́вим.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Горькоро́дныя преложи́ дре́вом Моисе́й исто́чники в пусты́ни дре́вле, Кресто́м ко благоче́стию язы́ков проявля́я преложе́ние.

Глубине́ вне́дривый секу́щую издаде́ Иорда́н дре́ву, Кресто́м и креще́нием сече́ние ле́сти зна́менуя.

Свяще́нно ополча́ются четвероча́стнии лю́дие, предходя́ще о́бразом свиде́тельства ски́нии, крестообра́зными чи́нми прославля́еми.

Чу́дно простира́емь, со́лнечныя лучи́ испуща́ше Кре́ст, и пове́даша небеса́ сла́ву Бо́га на́шего.

Пе́снь 5.

Ирмос: О, треблаже́нное Дре́во, на не́мже распя́ся Христо́с, Ца́рь и Госпо́дь, и́мже паде́ дре́вом прельсти́вый, Тобо́ю прельсти́вся, Бо́гу пригвозди́вшуся пло́тию, подаю́щему ми́р душа́м на́шим.

Тебе́, приснопе́тое дре́во, на не́мже простре́ся Христо́с, Еде́м храня́щее обраща́ющееся ору́жие, Кре́сте, устыде́ся: стра́шный же херуви́м уступи́, на тебе́ пригвожде́нному Христу́, подаю́щему ми́р душа́м на́шим.

Подзе́мных си́лы проти́вныя Креста́ страша́тся начерта́ема зна́мения на возду́се, по нему́же хо́дят небе́сных и земноро́дных ро́ди, коле́на преклоня́юще Христу́, подаю́щему ми́р душа́м на́шим.

Заря́ми нетле́нными я́влься Боже́ственный Кре́ст омраче́нным язы́ком, заблужде́нным в пре́лести, Боже́ственный све́т облиста́в, усвоя́ет на не́м пригвожде́нному Христу́, подаю́щему ми́р душа́м на́шим.

Пе́снь 6.

Ирмос: Во́днаго зве́ря во утро́бе дла́ни Ио́на крестови́дно распросте́р, спаси́тельную стра́сть прообража́ше я́ве; те́м, тридне́вен изше́д, преми́рное Воскресе́ние прописа́ше, пло́тию пригвожде́ннаго Христа́ Бо́га, и тридне́вным Воскресе́нием ми́р просве́щшаго.

Ста́ростию преклони́вся и неду́гом отягче́н, испра́вися Иа́ков, ру́це премени́в, де́йствие явля́я жизноно́снаго Креста́: и́бо ве́тхость зако́ннаго сено́внаго писа́ния новописа́, на се́м пло́тию пригвозди́выйся Бо́г, и душегуби́тельный неду́г ле́сти отгна́.

На ю́ныя возложи́в дла́ни боже́ственный Изра́иль, крестови́дно главы́ явля́ше, я́ко старе́йшая сла́ва, законослужи́тели лю́дие. Те́мже, подмне́вся та́ко испрельсти́тися, не измени́ жизноно́снаго о́браза: превзы́дут бо лю́дие Христо́вы Бо́жии новоутвержде́ннии, вопия́ху, Кресто́м огражда́еми.

Конда́к, гла́с 4.

Вознесы́йся на Кре́ст во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же, возвесели́ нас си́лою Твое́ю, побе́ды дая́ на сопоста́ты, посо́бие иму́щу Твое́, ору́жие ми́ра непобеди́мую побе́ду.

Икос:

Иже до тре́тияго небесе́ восхище́н бы́сть в ра́й, и глаго́лы слы́шав неизрече́нныя и боже́ственныя, и́хже не ле́ть язы́ки (челове́ческими) глаго́лати, что́ Гала́том пи́шет, я́ко рачи́телие писа́ний прочто́сте и позна́сте: мне́, глаго́лет, хвали́тися да не бу́дет, то́кмо во еди́ном Кресте́ Госпо́дни, на не́мже страда́в, уби́ стра́сти. Того́ у́бо и мы́ изве́стно да держи́м, Кре́ст Госпо́день, хвалу́ вси́: е́сть бо на́м спаси́тельное сие́ Дре́во, ору́жие ми́ра, непобеди́мая побе́да.

Пе́снь 7.

Ирмос: Безу́мное веле́ние мучи́теля злочести́ваго лю́ди поколеба́, ды́шущее преще́ние и злохуле́ние богоме́рзкое; оба́че три́ о́троки не устраши́ я́рость зве́рская, ни о́гнь снеда́яй, но, противоды́шущу росоно́сному Ду́ху, со огне́м су́ще, поя́ху: препе́тый отцев и на́с Бо́же, благослове́н еси́.

От дре́ва вкуси́в, пе́рвый в челове́цех, в тле́ние всели́ся: отверже́нием бо жи́зни безче́стнейшим осуди́вся, всему́ ро́ду телотле́нен не́кий яко вре́д неду́га преподаде́; но, обре́тше, земноро́днии, воззва́ние кре́стным дре́вом, зове́м: препе́тый отце́в и на́с Бо́же, благослове́н еси́.

Разруши́ повеле́ние Бо́жие преслуша́ние, и дре́во принесе́ сме́рть челове́ком, е́же неблаговре́менно прича́стно бы́вшее: во утвержде́ние же зело́ честна́го. Отту́ду жи́зни дре́во возбраня́емо бе́, е́же разбо́йнику злоуме́ршу отве́рзе, благоразу́мно зову́щу: препе́тый отце́в и на́с Бо́же, благослове́н еси́.

Жезла́ объе́млет кра́й Ио́сифова, бу́дущая зря́, Изра́иль, ца́рствия держа́вное, я́ко возъиму́ществит пресла́вный Кре́ст, проявля́я: се́й бо царе́й победоно́сная похвала́, и све́т ве́рою зову́щим: препе́тый отце́в и на́с Бо́же, благослове́н еси́.

Пе́снь 8.

Ирмос: Благослови́те, о́троцы, Тро́ицы равночи́сленнии, Соде́теля Отца́ Бо́га, по́йте снизше́дшее Сло́во, и о́гнь в ро́су претво́ршее и превозноси́те все́м жи́знь подава́ющаго Ду́ха Всесвята́го во ве́ки.

Воздвиза́ему дре́ву, окропле́ну Кро́вию вопло́щшагося Сло́ва Бо́га, по́йте, небе́сныя си́лы; земны́х воззва́ние пра́зднующе, лю́дие, поклони́теся Христо́ву Кресту́, и́мже ми́ру воста́ние во ве́ки.

Земноро́днии, дла́ньми, строи́телие благода́ти, Кре́ст, на не́мже стоя́ше Христо́с Бо́г, возноси́те священноле́пно и копие́, Бо́жия Сло́ва Те́ло пробо́дшее, да ви́дят язы́цы вси́ спасе́ние Бо́жие, сла́вяще Его́ во ве́ки.

Боже́ственным судо́м предъизбра́ннии, весели́теся, христиа́нстии ве́рнии ца́рие, хвали́теся победоно́сным ору́жием, прие́мше от Бо́га Кре́ст честны́й: в се́м бо коле́на бра́ней, де́рзости и́щуще, разсыпа́ются во ве́ки.

Пе́снь 9.

Ирмос: Та́ин еси́, Богоро́дице, ра́й, невозде́ланно возрасти́вший Христа́, Имже кре́стное живоно́сное на земли́ насади́ся Дре́во. Те́м, ны́не возноси́му, покланя́ющеся Ему́, Тя́ велича́ем.

Да возра́дуются древа́ дубра́вная вся́, освяти́вшуся естеству́ и́х, от Него́же изнача́ла насади́шася, Христу́ распросте́ршуся на Дре́ве. Те́м, ны́не возноси́му, покланя́ющеся Ему́, Тя́ велича́ем.

Свяще́нный воста́ ро́г и глава́ все́м богому́дрым — Кре́ст, и́мже гре́шных мы́сленно стира́ются ро́ги вси́; те́м, ны́не возноси́му, покланя́ющеся ему́, Тя́ велича́ем.

Го́рести уби́йственныя, я́же от дре́ва, не оста́вив, Го́споди, Кресто́м бо сию́ соверше́нно истреби́л еси́. Сего́ ра́ди и дре́вом услади́ иногда́ го́ресть во́д Ме́рры: прообразу́ющее Креста́ де́йство, е́же вся́ си́лы небе́сныя велича́ют.

Непреста́нно гружа́емыя мра́ком пра́отца, Го́споди, Кресто́м возвы́сил еси́ дне́сь. Яко бо ле́стию весьма́ неудержа́нно естество́ преднизведе́ся, всеро́дне ны́ па́ки испра́ви све́т Креста́ Твоего́, его́же, ве́рнии, велича́ем.

Да о́браз пока́жеши ми́ру покланя́емый, Го́споди, Креста́, во все́х я́ко пресла́вный, на небесе́х изобрази́л еси́, све́том безме́рным озаре́н, царю́ всеору́жие непобеди́мое. Те́м Тя́ вся́ си́лы небе́сныя велича́ют.

Ирмос: Сне́дию дре́ва ро́ду прибы́вшая сме́рть Кресто́м упраздни́ся дне́сь, и́бо прама́терняя всеро́дная кля́тва разруши́ся Прозябе́нием Чи́стыя Богома́тере, Юже вся́ си́лы небе́сныя велича́ют.

Свети́лен.

Кре́ст — храни́тель всея́ вселе́нныя, Кре́ст — красота́ Це́ркве, Кре́ст — царе́й держа́ва, Кре́ст — ве́рных утвержде́ние, Кре́ст — Ангелов сла́ва и де́монов я́зва.

Сла́ва, и ны́не.

Кре́ст воздвиза́ется дне́сь, и ми́р освяща́ется: Иже бо со Отце́м сидя́й и Ду́хом Святы́м, на се́м ру́це распростре́, ми́р ве́сь привлече́ к Твоему́, Христе́, позна́нию; и́же у́бо на Тя́ наде́ющияся боже́ственныя сподо́би сла́вы.

Стихи́ры, гла́с 8.

О, пресла́внаго чудесе́, / живоно́сный са́д, / Кре́ст пресвяты́й / на высоту́ возноси́мь явля́ется дне́сь. / Славосло́вят вси́ концы́ земни́и, / устраша́ются де́монския полки́. / О, каковы́й да́р земны́м дарова́ся! / Имже, Христе́, спаси́ ду́ши на́ша, / я́ко еди́н Благоутро́бен.

О, пресла́внаго чудесе́, / я́ко гро́зд, испо́лнен живота́, / понесы́й Вы́шняго, / от земли́ воздвиза́емь Кре́ст ви́дится дне́сь, / и́мже вси́ к Бо́гу привлеко́хомся, / и поже́рта бы́сть до конца́ сме́рть. / О, Дре́во пречестно́е, / и́мже восприя́хом во Еде́ме безсме́ртную пи́щу, / Христа́ сла́вяще!

О, пресла́внаго чудесе́, / широта́ Креста́ и долгота́ / небеси́ равна́ е́сть, / я́ко Боже́ственною благода́тию освяща́ет вся́ческая. / О се́м язы́цы ва́рварстии побежда́ются, / о се́м ски́птры царе́й утвержда́ются. / О, боже́ственныя ле́ствицы, / е́юже восхо́дим на небеса́, / вознося́ще в пе́снех Христа́ Го́спода!

Сла́ва, и ны́не, гла́с 6:

Днесь происхо́дит Кре́ст Госпо́день, и ве́рнии прие́млют того́ жела́нием, и взе́млют исцеле́ния души́ же и те́ла и вся́кия боле́зни. Сего́ целу́им ра́достию и стра́хом: стра́хом, греха́ ра́ди, я́ко недосто́йни су́ще; ра́достию же, спасе́ния ра́ди, е́же подае́т ми́ру на то́м пригвозди́выйся Христо́с Бо́г, име́яй ве́лию ми́лость.

Пое́м стихи́ры самогла́сны Честна́го Креста́, гла́с 2:

Прииди́те, ве́рнии, Животворя́щему Дре́ву поклони́мся, на не́мже Христо́с, Ца́рь сла́вы, во́лею ру́це распросте́р, вознесе́ на́с на пе́рвое блаже́нство, я́же пре́жде вра́г сла́стию укра́д, изгна́ны от Бо́га сотвори́. Прииди́те, ве́рнии, Дре́ву поклони́мся, и́мже сподо́бихомся неви́димых вра́г сокруши́ти главы́. Прииди́те, вся́ оте́чествия язы́ков, Кре́ст Госпо́день пе́сньми почти́м: ра́дуйся, Кре́сте, па́дшаго Ада́ма соверше́нное избавле́ние, о тебе́ бо ве́рнейшии ца́рие на́ши хва́лятся, я́ко твое́ю си́лою исма́ильтеския лю́ди держа́вно покаря́юще. Тя́ ны́не со стра́хом христиа́не целу́юще, на тебе́ пригвозди́вшагося Бо́га сла́вим, глаго́люще: Го́споди, на то́м пригвозди́выйся, поми́луй на́с, я́ко Бла́г и Человеколю́бец.

Гла́с 5:

Прииди́те, лю́дие, пресла́вное чу́до ви́дяще, Креста́ си́ле поклони́мся: я́ко дре́во в раи́ сме́рть прозябе́, сие́ же жи́знь процвете́, безгре́шнаго иму́щее пригвожде́нна Го́спода. От Него́же, вси́ язы́цы, нетле́ние взе́млюще, зове́м: Иже Кресто́м сме́рть упраздни́вый, и на́с свободи́вый, сла́ва Тебе́.

Глас то́йже:

Гла́с проро́к Твои́х, Иса́ии и Дави́да, испо́лнися, Бо́же, глаго́лющий: прии́дут вси́ язы́цы, Го́споди, и покло́нятся пред Тобо́ю. Се́ бо лю́дие, и́же Твоея́, Бла́же, благода́ти напо́лнишася, во дво́рех Твои́х Иерусали́ма. Кре́ст претерпе́вый за ны́, и Воскресе́нием Твои́м животворя́й, сохрани́ и спаси́ ны.

Гла́с 6:

Проро́ков гла́си Дре́во свято́е предвозвести́ша, и́мже дре́вния свободи́ся кля́твы сме́ртныя Ада́м, тва́рь же, дне́сь возноси́му тому́, совозвыша́ет гла́с, от Бо́га прося́щи бога́тыя ми́лости; но, еди́ный в благоутро́бии, безме́рный Влады́ко, очище́ние бу́ди на́м и спаси́ ду́ши на́ша.

Гла́с 8:

Гла́с проро́ка Твоего́ Моисе́я, Бо́же, испо́лнися, глаго́ляй: у́зрите Живо́т ва́ш, ви́сящь пред очесы́ ва́шими. Дне́сь Кре́ст воздвиза́ется, и ми́р от ле́сти свобожда́ется, дне́сь Христо́во Воскресе́ние обновля́ется, и концы́ земли́ ра́дуются, в кимва́лех Дави́дски пе́снь Тебе́ принося́ще и глаго́люще: соде́лал еси́ спасе́ние посреде́ земли́, Бо́же, Кре́ст и Воскресе́ние; и́хже ра́ди на́с спа́сл еси́, Бла́же и Человеколю́бче, Всеси́льне Го́споди, сла́ва Тебе́.

Гла́с то́йже:

Дне́сь Влады́ка тва́ри и Госпо́дь сла́вы на Кресте́ пригвожда́ется и в ре́бра пробода́ется. Же́лчи и о́цта вкуша́ет сла́дость церко́вная. Венце́м от те́рния облага́ется, покрыва́яй не́бо о́блаки. Оде́ждею облачи́тся поруга́ния, и зауша́ется бре́нною руко́ю, руко́ю созда́вый челове́ка. По плеще́ма бие́н быва́ет, одева́яй не́бо о́блаки. Заплева́ния и ра́ны прие́млет, поноше́ния и зауше́ния, и вся́ терпи́т мене́ ра́ди осужде́ннаго, Изба́витель мо́й и Бо́г, да спасе́т ми́р от пре́лести, я́ко Благоутро́бен.

Сла́ва, и ны́не, гла́с то́йже:

Дне́сь неприкоснове́нный существо́м, прикоснове́н мне́ быва́ет, и стра́ждет стра́сти свобожда́яй мя́ от страсте́й; све́т подава́яй слепы́м, от беззако́нных усте́н оплева́ется, и дае́т плещи́ за плене́нныя на ра́ны. Сего́ Чи́стая Де́ва и Ма́ти на Кресте́ зря́щи, боле́зненно веща́ше: увы́ Мне́, Ча́до Мое́, что́ сие́ сотвори́л еси́? Кра́сный добро́тою па́че все́х челове́к, бездыха́нный и беззра́чный явля́ешися, не име́я ви́да, ниже́ добро́ты. Увы́ Мне́, Мо́й Све́те, не могу́ спя́ща зре́ти Тя́, утро́бою уязвля́юся, и лю́тое ору́жие се́рдце Мое́ прохо́дит. Воспева́ю Твоя́ стра́сти, покланя́юся благоутро́бию Твоему́, Долготерпели́ве, Го́споди, сла́ва Тебе́!

Величание Воздвижению Креста Господня

Величаем Тя, / Живодавче Христе, / и чтем Крест Твой Святый, / имже нас спасл еси от работы вражия.

Молитва первая Честному и Животворящему Кресту Господню

Кресте Честный, хранитель души и телу буди ми: образом своим бесы низлагая, враги отгоняя, страсти упражняя и благоговение даруя ми, и жизнь, и силу, содействием Святаго Духа и честными Пречистыя Богородицы мольбами. Аминь.

Молитва вторая Честному и Животворящему Кресту Господню

О, Пречестный и Животворящий Кресте Господень! Древле убо был еси казни позорныя орудие, ныне же знамение спасения нашего присно почитаемое и прославляемое! Како достойне возмогу аз, недостойный, воспети Тя и како дерзну преклонити колена сердца моего пред Искупителем моим, исповедая грехи свои! Но милосердие и неизреченное человеколюбие Распеншегося на тебе смиренное Дерзновение подает ми, да отверзу уста моя воеже славити Тя; сего ради вопию Ти: радуйся, Кресте, Церкве Христовы красота и основание, всея вселенныя — утверждение, христиан всех — упование, царей — держава, верных — прибежище, Ангелов — слава и воспевание, демонов — страх, губительство и отгнание, нечестивых и неверных — посрамление, праведных — услаждение, обремененных — ослаба, обуреваемых — пристанище, заблудших — наставниче, одержимых страстьми — раскаяние, нищих — обогащение, плавающих — кормчий, слабых — сила, во бранех — победа и одоление, сирых — верное покровение, вдов — заступниче, дев — целомудрия охранение, ненадеянных — надежда, недужных — врач и мертвых — воскресение! Ты, прообразованный чудотворящим жезлом Моисея, животворный источник, напаяющий жаждущия духовныя жизни и услаждающий наши скорби; Ты — одр, на немже царственно почил тридневно Воскресший Победитель ада. Сего ради и утро, и в вечер, и полудне прославляю Тя, треблаженное Древо, и молю волею Распеншегося на Тебе, да просветит Он и укрепит Тобою ум мой, да открыет в сердце моем источник любве совершенней и вся деяния моя и путие мои Тобою осенит, да выну величаю Пригвожденнаго на Тебе, грех моих ради, Господа Спасителя моего. Аминь.

Устав о катавасиях

Что такое катавасия и в чем отличие праздничной катавасии от бyдничного покрывающего ирмоса?

Во–первых, катавасия, согласно yставy, поется по каждой песни канона, а бyдничный покрывающий ирмос — только по 3,6,8 и 9 песни.

Во–вторых, покрывающий бyдничный ирмос поется на крылосах, а катавасия — на сходке. Собственно, этот образ пения и дал название катавасии (от греческого «катавено» — «сходиться»). По yставy оба лика сходились на середине храма и пели.

Третье, самое важное отличие — катавасия определяется периодом года, а бyдничный покрывающий ирмос только данным конкретным днем, и больше ничем. Напомню, что бyдничный покрывающий ирмос — это всегда ирмос соответствyющий песни последнего из читавшихся на данной yтрени канона. А катавасия зависит от того времени, в котором мы живем.

Когда поется катавасия? Во–первых, во все воскресные дни, а во–вторых, в дни с красным знаком Типикона (славословие, полиелей, бдение). Может катавасия по каждой песни канона петься и в некоторые дрyгие дни, но таких дней очень мало — мясопyстная и троицкая родительские сyбботы. Там славословие не поется (день не воскресный), тем не менее катавасия — по каждой песни. В остальные дни поются бyдничные покрывающие ирмосы.

От чего зависит, какyю петь катавасию? Только от периода года. Весь год разбит на периоды, не равные по протяженности, и в течение каждого из этих периодов поется вполне определенная катавасия.

От 1 по 21 сентября (даты по старомy стилю), т. е. до отдания Воздвижения, поется катавасия «Крест начертав» (Воздвиженская катавасия). 8 глас.

От 22 сентября до 20 ноября (от первого дня после отдания Воздвижения до предпразднства Введения во храм Пр. Богородицы) — «Отверзy yста моя». 4 глас.

От 21 ноября по 31 декабря (от предпразднства Введения до отдания Рождества Христова) — «Христос рождается». 1 глас.

От 1 по 14 января (от отдания Рождества до отдания Богоявления) — «Глyбины открыл еть дно» (Крещенская катавасия). 2 глас.

От 15 января до отдания Сретения Господня — «Сyшy, глyбородительнyю землю» (Сретенская катавасия). 3 глас.

Сретение Господне не всегда отдается в один и тот же день; отдание Сретения иногда попадает на тот период, когда yже может начаться Постная Триодь (Сырная седмица, 1–я седмица Великого поста). Но в обычной ситyации отдание Сретения бывает 9 февраля.

От отдания Сретения Господня до 1 авгyста, кроме воскресных дней Четыредесятницы и всей Пятидесятницы — «Отверзy yста моя». 4 глас.

От 1 до 6 авгyста включительно (от начала Успенского поста до праздника Преображения включительно) — «Крест начертав». Глас 8.

От 7 до 13 авгyста — «Лице Израильтистии». 4 глас.

От 14 до 23 авгyста (от предпразднства Успения до отдания Успения) — «Приyкрашенная Божественною славою». Глас 1.

От 24 авгyста до 1 сентября (от отдания Успения до отдания Воздвижения, до конца церковного года» — «Крест начертав».

Поделитесь на страничке

Следующая глава >

Глава 55. Отпустительнии тропари, кондаки, и светильны Господа дневнии, и на литургиах, прокимени, апостоли, аллилуиаре, Евангелиа, и причастны всея седмицы

В неделю вечера тропарь безплотных, глас 4:

Небесных воинств Архистратизи, молим вас присно мы недостойнии, да вашими молитвами оградите нас кровом крилу невещественныя вашея славы, сохраняюще нас припадающих прилежно, и вопиющих: от бед избавите нас, яко чиноначальницы вышних сил.

Богородичен, глас тойже:

Воспитавшейся во храме во Святая Святых, одеянней верою и премудростию, и безмерным девством, Архистратиг Гавриил принесе с Небесе целование, и еже радуйся, радуйся Благословенная, радуйся Препрославленная, Господь с Тобою.

Тойже и в понедельник на Бог Господь.

Кондак, глас 2:

Архистратизи Божии, служителие божественныя славы, Ангелов начальницы, и человеком наставницы, полезное нам просите, и велию милость, яко безплотных архистратизи.

Светилен:

Небо звездами украсивый яко Бог, и Твоими Ангелы всю землю просветивый, Содетелю всех, поющия Тя спасай.

Богородичен:

Сладосте Ангелов, скорбящих радосте, Христиан предстательнице Дево Мати Господня, заступи нас, и избави вечных мук.

На литургии, прокимен, глас 4: Творяй Ангелы Своя духи, и слуги Своя пламень огненный.

Стих: Благослови душе моя Господа, Господи Боже мой возвеличился еси зело.

Апостол к евреем, зачало 305: Аще глаголанное Ангелы:

Аллилуиа, глас 5: Хвалите Господа вси Ангели Его, хвалите Его вся силы Его.

Стих: Яко Той рече, и быша: Той повеле, и создашася.

Евангелие Матфеа, зачало 52: Уподобися Царствие Небесное человеку, сеявшу доброе семя на селе своем:

Причастен: Творяй Ангелы Своя духи:

В понедельник вечера тропарь Предтечи, глас 2:

Память праведнаго с похвалами, тебе же довлеет свидетельство Господне Предтече, показал бо ся еси воистинну и пророков честнейший, яко и в струях крестити сподобился еси Проповеданнаго: темже за истину пострадав радуяся, благовестил еси и сущим во аде Бога явльшагося плотию, вземлющаго грех мира, и подающаго нам велию милость.

Богородичен, глас тойже:

Божественнаго быхом общницы естества Тобою Богородице Приснодево: Бога бо нам воплотившагося родила еси. Темже по долгу Тя вси благочестно величаем.

Кондак, глас 2. Подобен: Вышних ищя:

Пророче Божий, и Предтече благодати, главу твою яко шипок священнейший от земли обретше, исцеления всегда приемлем: ибо паки якоже прежде в мире проповедуеши покаяние.

Светилен:

Предтечу Иоанна, и Крестителя Спасова, во пророцех Пророка, и пустыни воспитание, Елисаветино рождение восхвалим вси.

Богородичен: Сладосте Ангелов: ищи в понедельник.

На литургии прокимен, глас 7: Возвеселится праведник о Господе, и уповает на Него.

Стих: Услыши Боже глас мой, внегда молити ми ся к Тебе.

Апостол Деяний, зачало 33: Якоже скончаваше Иоанн течение:

Аллилуиа, глас 4: Праведник яко финикс процветет, яко кедр, иже в Ливане, умножится.

Стих: Насаждени в дому Господни, во дворех Бога нашего процветут.

Евангелие Иоанна, зачало 3: Виде Иоанн Иисуса грядуща к себе:

Причастен: В память вечную будет праведник:

Во вторник вечера, тропарь Креста, глас 1:

Спаси Господи люди Твоя, и благослови достояние Твое, победы на сопротивныя даруя, и Твое сохраняя Крестом Твоим жительство.

Крестобогородичен:

Твое предстательство имуще Пречистая, и Твоими молитвами лютых избавляеми, Крестом Сына Твоего везде соблюдаеми, по долгу Тя вси благочестно величаем.

Кондак, глас 4:

Вознесыйся на Крест волею, тезоименитому Твоему новому жительству, щедроты Твоя даруй Христе Боже, возвесели силою твоею православныя христианы, победы дая им на сопостаты, пособие имущу Твое оружие мира, непобедимую победу.

Светилен:

Крест хранитель всея вселенныя, Крест красота Церкве, Крест царей держава, Крест верных утверждение, Крест Ангелов слава, и демонов язва.

Крестобогородичен:

У креста предстоящи Тя безсеменно Рождшая, и рыдающи вопияше: увы сладчайшее Чадо, како зашел еси от очию Моею? Како в мертвых вменился еси?

На литургии прокимен, глас 3: Песнь Богородицы: Величит душа моя Господа, и возрадовася дух Мой о Бозе Спасе Моем.

Стих: Яко призре на смирение Рабы Своея, се бо от ныне ублажат Мя вси роди.

Апостол к филипписием, зачало 240: Сие да мудрствуется в вас:

Аллилуиа, глас 8: Слыши Дщи и виждь, и приклони ухо Твое.

Стих: Лицу Твоему помолятся Богатии людстии.

Евангелие Луки, зачало 54: Вниде Иисус в весь некую:

Причастен: Чашу спасения прииму, и имя Господне призову.

В среду вечера, тропарь апостолов, глас 3:

Апостоли святии, молите милостиваго Бога, да прегрешений оставление подаст душам нашим.

Иный святаго Николаа, глас 4:

Правило веры, и образ кротости, воздержания учителя, яви тя стаду твоему, Яже вещей Истина: сего ради стяжал еси смирением высокая, нищетою Богатая. Отче священноначальниче Николае, моли Христа Бога, спастися душам нашим.

Богородичен:

Слово Отчее, Христа Бога нашего, от Тебе воплотившагося познахом Богородице Дево, едина Чистая, едина Благословенная: тем непрестанно Тя воспевающе величаем.

Кондак апостолов, глас 2:

Твердыя и Боговещанныя проповедатели, верх ученик Твоих Господи, приял еси в наслаждение благих Твоих и покой: болезни бо онех, и смерть приял еси паче всякаго всеплодия, едине сведый сердечная.

Иный святаго Николаа, глас 3. Подобен: Дева Днесь:

В мирех святе, священнодействитель показался еси, Христово бо преподобне Евангелие исполнив, положил еси душу твою о людех твоих, и спасл еси неповинныя от смерти. Сего ради освятился еси, яко великий таинник Божия благодати.

Светилен апостолов. Подобен: Жены услышите:

Во всю подсолнечную текше, проповедасте Христово от Девы святое воплощение воистинну, от прелести обращающе языки, и просвещающе, и вся научающе, Троицу почитати святую, апостоли Спасовы.

Подобен:

Великаго началопастыря, и иерарха вси председателя Мирликийскаго Николаа хвалим: многи бо мужи спасе, неправедно умрети имущия, царю является со Авлавием во сне, реша неправедно изречение.

Богородичен:

Марие честнейшая, златая Кадильнице, невместимаго Божества Приятелище бывшее, в немже Отец благоволи, Сын же вселися, и Дух Святый осенив Тя Отроковице, показа Богородицу.

На литургии прокимен, глас 8: Во всю землю изыде вещание их, и в концы вселенныя глаголы их.

Стих: Небеса поведают славу Божию, творение же руку Его возвещает твердь.

Апостол к коринфяном, зачало 131: Бог ны посланники последния яви:

Аллилуиа, глас 1: Исповедят Небеса чудеса Твоя Господи, ибо истину Твою в Церкви святых.

Стих: Бог прославляем в совете святых.

Евангелие Матфеа, зачало 34, от полу: Призва Иисус обанадесять ученики Своя:

Причастен: Во всю землю изыде вещание их:

В четверток вечера: Тропарь, глас 1: Спаси Господи люди Твоя:

Крестобогородичен: Твое предстательство имуще Пречистая:

Кондак: Вознесыйся на Крест волею:

Светилен: Крест хранитель всея вселенныя:

Крестобогородичен: У Креста предстоящи: сия вся писашася в среду.

На литургии прокимен, глас 7: Возносите Господа Бога нашего, и покланяйтеся подножию ногу Его, яко свято есть.

Стих: Господь воцарися, да гневаются людие.

Апостол к коринфяном, зачало 125: Слово крестное:

Аллилуиа, глас 1: Помяни сонм Твой, егоже стяжал еси исперва.

Стих: Бог же Царь наш прежде века, содела спасение посреде земли.

Причастен: Спасение соделал еси посреде земли Боже.

В пяток вечера тропарь, глас 2:

Апостоли, мученцы и пророцы, святителие, преподобнии и праведнии, добре подвиг совершившии, и веру соблюдшии, дерзновение имуще ко Спасу, о нас Того яко блага молите, спастися, молимся, душам нашим.

Другий за упокой:

Помяни Господи, яко благ рабы Твоя, и елика в житии согрешиша, прости: никтоже бо безгрешен, токмо Ты могий и преставленным дати покой.

Богородичен:

Мати святая неизреченнаго света, ангельскими тя песньми почитающе, благочестно величаем.

Егда глаголем, Слава, кондак, глас 8:

Со святыми упокой Христе души раб Твоих, идеже несть болезнь, ни печаль, ни воздыхание, но жизнь безконечная.

И ныне, настоящий мученичен, глас тойже:

Яко начатки естества, Насадителю твари, вселенная приносит Ти Господи Богоносныя мученки: тех молитвами в мире глубоце, Церковь твою, жительство Твое Богородицею соблюди, Многомилостиве.

Светилен:

Иже и мертвыми и живыми обладаяй яко Бог, и святыми Твоими всю землю просветивый, содетелю всех, поющия Тя спасай.

Богородичен:

Мы о Тебе хвалимся Богородице, и к Богу Тя имамы предстательство, простри руку Твою необоримую, и сокруши враги наша, Твоим низпосли рабом помощь от святаго.

На литургии прокимен, глас 8: Веселитеся о Господе, и радуйтеся праведнии.

Стих: Блажени, ихже оставишася беззакония, и ихже прикрышася греси.

И умерших, глас 7: Души их во благих водворятся.

Апостол к солуняном, зачало 270: Не хощу вас не ведети о умерших:

Аллилуиа, глас 4: Воззваша праведнии, и Господь услыша их, и от всех скорбей их избави их.

Стих: Многи скорби праведным, и от всех их избавит я Господь.

Стих: Блажени, яже избрал и приял еси Господи, и память их в род и род.

Евангелие Иоанна, зачало 17: Аминь аминь глаголю вам, яко слушаяй словесе Моего:

Причастен: Радуйтеся:

Другий, Блажени, яже: